O presidente do TSXG defende “unha Xustiza aberta á innovación, comprometida coa eficacia e firme na súa independencia”
O presidente do Tribunal Superior de Xustiza de Galicia (TSXG), Ignacio Picatoste Sueiras, defendeu no DATAfórum “unha Xustiza aberta á innovación, comprometida coa eficacia e firme na súa independencia; capaz de cambiar as súas ferramentas sen perder os seus principios e de modernizarse sen afastarse da cidadanía”.
Durante a súa intervención no evento, que se celebra ata o 23 de outubro na Coruña e está organizado polo Ministerio da Presidencia, Xustiza e Relacións coas Cortes, a Universidade da Coruña e o Concello da Coruña, coa colaboración do Tribunal Superior de Xustiza de Galicia, destacou a importancia de utilizar os datos para detectar necesidades, identificar onde se acumula o traballo e organizar mellor os recursos. “Os datos son unha ferramenta valiosa para tomar decisións, sempre que saibamos interpretalos: unha cifra pode sinalar un problema, pero non sempre explica as súas causas”, subliñou.
Ademais, engadiu que “estar atentos a esa evolución permite anticipar necesidades, identificar novos retos e adaptar a organización e as respostas, sempre dentro do marco da lei e das garantías que rexen a actuación xudicial”.
Neste sentido, sinalou que “a nova organización dos tribunais impulsada polo Ministerio abre oportunidades para mellorar a coordinación e aproveitar mellor os recursos”, ao tempo que recalcou que se debe “afrontar ese proceso con confianza nos seus obxectivos, pero tamén con realismo: unha reforma só cumpre o seu propósito cando os seus beneficios se traducen nun mellor funcionamento dos órganos xudiciais”.
O presidente do TSXG indicou tamén que a tecnoloxía pode contribuír a mellorar o funcionamento da Administración de Xustiza, pero advertiu de que “non pode asumir a responsabilidade de xulgar”, pois esta tarefa esixe “a mirada humana, a empatía e a capacidade de comprender as circunstancias de quen acode aos tribunais”. Por iso, recalcou que “esa dimensión humana é, e debe seguir sendo, esencial no exercicio da función xudicial”.
Durante a súa intervención, Picatoste expuxo tres eixes para abordar a Xustiza do futuro: comprender mellor as necesidades da sociedade, aproveitar a transformación organizativa e tecnolóxica para mellorar a resposta da Administración de Xustiza e preservar as garantías e os principios esenciais do sistema xudicial. “A modernización debe reforzar as garantías da Xustiza, non debilitalas”, salientou.
No DATAfórum tamén participaron na primeira sesión a maxistrada da Sección Cuarta da Audiencia Provincial da Coruña Zulema Gento Castro e o xuíz do Tribunal de Instancia de Ribeira Borja Pérez Muñiz quen explicaron aos asistentes, na súa maioría estudantes, en que consiste o seu traballo.
Pola súa banda, o maxistrado da Sala do Social do TSXG, Fernando Lousada Arochena, ofreceu unha conferencia na que abordou as enfermidades feminizadas na xurisdición social.