Concello

Evaristo Ben percorreu as instalacións xunto ao alcalde de Curtis, Javier Caínzos, e ao tenente de alcalde, Iván Maques, para avaliar o seu estado e estudar novas vías de dinamización

O deputado provincial e portavoz do PP, Evaristo Ben, visitou o Centro Etnográfico de Teixeiro co obxectivo de comprobar sobre o terreo o estado da infraestrutura e explorar fórmulas para potenciar o seu valor como recurso cultural e turístico na provincia. Na visita estivo acompañado polo alcalde de Curtis, Javier Caínzos, e polo tenente de alcalde, Iván Maques, cos que analizou necesidades de mantemento e posibles liñas de crecemento vencelladas ao desenvolvemento local e comarcal.

Ben puxo o acento na importancia de conservar espazos que, como este centro, contribúen a gardar a memoria e a identidade dos municipios. Na mesma liña, defendeu que o recinto debe funcionar como un equipamento ‘vivo’, capaz de atraer visitantes e xerar actividade arredor do territorio. Pola súa banda, Caínzos sinalou a necesidade de cooperación entre administracións para garantir recursos e unha correcta conservación do edificio.

A visita estruturouse en tres eixes: unha revisión técnica do estado das instalacións, a análise de proxectos que amplíen o uso do centro como espazo para actividades e a vontade de manter unha folla de ruta con apoio institucional para iniciativas ligadas ao equilibrio territorial e ao impulso do rural.

O Centro Etnográfico de Teixeiro, tamén coñecido como Centro Etnográfico do Río Mandeo, conta con zona expositiva, salón de actos, aulas e albergue, e está concibido como un espazo de divulgación e formación arredor do patrimonio cultural e etnográfico da conca do Mandeo.