O PP esixe solucións urxentes para os accesos á nova estación de tren da Coruña
O portavoz do Grupo Popular, Miguel Lorenzo, pediu hoxe solucións inmediatas para os problemas que afectan os accesos á nova estación de tren da Coruña. O líder popular denunciou a falta de planificación e coordinación entre o Concello e o Goberno estatal, subliñando que “os coruñeses están a pagar as consecuencias desta desorganización”.
Durante unha visita á zona da nova estación, Lorenzo destacou unha longa lista de carencias que sofren os usuarios: mala sinalización, ausencia de pasos de peóns e beirarrúas, barro, falta de aparcamento adecuado, un vestíbulo interior insuficiente e unha cobertura escasa de autobuses urbanos. “É unha estación provisional que estará operativa durante un ano e medio, non uns días. Esta situación empeorará nos próximos días coas vacacións de Nadal, cando máis xente chegue ou saia da cidade”, advertiu.
Miguel Lorenzo lamentou que, a pesar de ser do mesmo partido, o Goberno municipal e o estatal “non son capaces de coordinarse”. “A alcaldesa estivo na inauguración, pero sen ter feito antes os deberes. Esta falta de previsión é unha constante que, unha vez máis, castiga aos coruñeses”, sinalou o portavoz.
Ademais, Lorenzo lembrou que os problemas ferroviarios na Coruña veñen de longo: atrasos nos trens, redución de frecuencias, avarías e dificultades para conseguir billetes. “Agora, os usuarios enfróntanse a unha estación que non cumpre os mínimos para unha cidade como a nosa”, engadiu.
O portavoz do PP tamén aproveitou para criticar outros casos de descoordinación entre as administracións, como a inseguridade, o atraso na AESIA, a paralización da Cuarta Rolda ou a falta de avances na Cidade das TIC. “Os coruñeses non merecen este abandono”, concluíu.