O PP denuncia que os atrasos de Inés Rey en obras de rehabilitación poñen en risco 6 millóns de euros de fondos europeos
O Grupo Popular advirte do retraso no comezo das obras de rehabilitación en varios barrios da cidade, un programa que conta con financiamento de fondos europeos e que podería sufrir recortes se continúan os atrasos, como xa sucedeu nas obras do Centro Cívico de O Birloque e no Centro de Baixa Exixencia.
Durante o pleno de setembro, o Grupo Popular preguntou ao Goberno Municipal sobre o grao de avance destas axudas destinadas á rehabilitación de 284 vivendas en catro barrios: Barrio das Flores (126), Labañou-Grupo María Pita (40), Ventorrillo-Casas de Franco (76) e Cidade Vella (42). A resposta do executivo local indicou que aínda non se concederon ditas axudas, xa que nin sequera se abriu a convocatoria.
O programa de rehabilitación, solicitado polo Concello en 2022, conta cun orzamento total próximo aos 16 millóns de euros, dos cales case 6 millóns proveñen de fondos europeos. Estes fondos están en perigo se as obras non se completan antes do 30 de xuño de 2026, e actualmente aínda non se iniciou o proceso necesario para poñelas en marcha: convocatorias, estudo de solicitudes, contratación e execución das obras.
O PP xa denunciou anteriormente a perda de máis de medio millón de euros de fondos europeos debido aos retrasos na execución doutras obras municipais, como as do Centro Cívico de O Birloque e o Centro de Baixa Exixencia, afirmando que a xestión de Inés Rey provoca que as poucas obras que se realizan cheguen con retrasos e custen máis diñeiro aos coruñeses.