O PP denuncia que A Coruña mantén 40 vivendas municipais baleiras e sen rehabilitar
O parlamentario autonómico e concelleiro do PP na Coruña, Roberto Rodríguez, denunciou no Parlamento galego que o Concello mantén 40 vivendas municipais baleiras á espera de ser rehabilitadas. Segundo o popular, estes inmobles poderían incorporarse ao parque público de alugueiro nun contexto de dificultades para acceder a unha vivenda e despois de coñecerse que 24 familias están en risco de desafiuzamento.
A situación volveu ao debate tras o ofrecemento da Xunta de Galicia de asumir as obras de rehabilitación, unha proposta vinculada á petición da Consellería de Vivenda para que o Concello ceda os pisos e poidan destinarse a persoas inscritas no rexistro de demandantes de vivenda.
Rodríguez cuestionou a xestión municipal e asegurou que o goberno de Inés Rey presupostou preto de oito millóns de euros para axudas á rehabilitación de vivendas e á instalación de ascensores, pero non convocou estas subvencións nos exercicios de 2024, 2025 e 2026. O PP considera que parte deses fondos poderían terse empregado para acondicionar os 40 inmobles.
O concelleiro popular defende que a rehabilitación debe acompañarse doutras medidas para aumentar a oferta de vivenda pública e facilitar o acceso a un fogar. Neste sentido, salientou a disposición da Xunta a asumir as obras e lembrou que na cidade están en marcha máis de 1.000 vivendas públicas.
Ademais, o desenvolvemento urbanístico de Monte Mero permitirá impulsar outras 4.400 vivendas, das que 3.500 serán protexidas, segundo os datos citados polo parlamentario. Rodríguez reclama tamén ao Concello que facilite novos terreos para que o Goberno galego poida ampliar a construción de vivenda pública na cidade.