O PP de Sada alerta sobre erros graves nas bases da convocatoria para a selección dun Técnico de Administración Xeral
A voceira do Grupo Municipal Popular de Sada, Esperanza Arias Ferreiro, advertiu sobre un erro grave nas bases da convocatoria para a selección dun Técnico de Administración Xeral (TAG). Segundo Arias, as bases esixen a posesión dun título de Licenciatura, Grao ou equivalente en Dereito, o que, segundo a portavoz, vulnera o disposto no artigo 76 do Real Decreto Lexislativo 5/2015, de 30 de outubro, que aproba o texto refundido da Lei do Estatuto Básico do Empregado Público.
Arias destacou que a normativa establece que só se pode esixir unha titulación específica cando así o determine unha disposición con rango de lei, situación que, segundo indica, non se dá neste caso. Polo tanto, as bases poderían estar viciadas de nulidade de pleno dereito segundo o artigo 47.2 da Lei 39/2015, o que as fai susceptibles de impugnación por calquera persoa interesada no procedemento. Isto podería atrasar considerablemente a cobertura deste posto, que está vacante dende 2021, prolongando as tramitacións e dificultando a xestión dos asuntos municipais.
Desde o Partido Popular de Sada lembraron ao alcalde a importancia de cumprir cos principios constitucionais de igualdade, mérito e capacidade que rexen o emprego público, así como coas esixencias en materia de transparencia e cumprimento rigoroso da lexislación aplicable.
Arias concluíu subliñando que "son xa demasiadas as ocasións nas que as políticas erráticas deste alcalde e do seu equipo de goberno ocasionaron consecuencias indesexables para o noso concello, prexudicando a imaxe da nosa vila e a calidade de vida dos nosos veciños". A voceira reafirmou o compromiso do PP de Sada de velar polos dereitos e garantías de todos os sadenses.