O PP de Oleiros demanda solucións aos problemas de cobertura telefónica
![Imaxe recurso de cobertura móbil](https://acorunaxa.com/wp-content/uploads/2024/07/Imaxe-recurso-de-cobertura-mobil.jpg)
O Partido Popular de Oleiros esixe ao Concello que solucione os problemas de cobertura de telefonía que afectan a gran parte dos veciños. Actualmente, Oleiros conta con trinta e tres antenas para os diferentes operadores, o que resulta insuficiente para atender as necesidades de comunicación dos case 40.000 habitantes do municipio.
Segundo o Partido Popular, estas zonas de “sombra” que afectan ao 46% do territorio municipal son consecuencia da falta de previsión do alcalde. Argumentan que o crecemento poboacional non vai acompañado do desenvolvemento de infraestruturas necesarias para cubrir as necesidades dos veciños. Ademais da cobertura telefónica, critican outros problemas como a rede de saneamento obsoleta, as vías de comunicación saturadas, os mantementos insuficientes e a falta de seguridade e efectivos policiais.
A portavoz municipal do Partido Popular, Loli Silva, destacou que estes problemas se agravan durante o verán, cando a poboación aumenta estacionalmente e hai unha maior afluencia de visitantes ás praias e eventos festivos de Oleiros. "Parece que a escasa empatía que practica o alcalde cos seus homólogos dos concellos veciños e outras administracións reflicte a pouca habilidade de Gelo para acadar acordos coas operadoras de telefonía e conseguir o despregue de antenas que Oleiros necesita. Un verán máis, os veciños vémonos condenados a sufrir os problemas de cobertura derivados da desatención e abandono aos que xa nos ten acostumados García Seoane", lamentou Silva.
"A situación é lamentable, sobre todo en eventos festivos como os de Santa Cruz, Mera ou Perillo, onde a rede de telefonía se satura e moita xente queda incomunicada, tanto en cobertura de voz como en datos", concluíu a portavoz popular.
O Partido Popular insiste na urxencia de mellorar a infraestrutura de telecomunicacións para garantir unha cobertura de calidade para todos os veciños e visitantes de Oleiros, especialmente durante a época estival.