O PP de Oleiros critica a "nefasta xestión" da auga por parte do Concello e de Aquaoleiros
O Partido Popular de Oleiros sinalou a “desastrosa xestión” do servizo de augas do municipio, levada a cabo pola empresa municipal Aquaoleiros, tras acumularse avarías e problemas de abastecemento que afectan diariamente aos veciños. Segundo a portavoz popular, Loli Silva, a situación evidencia un sistema de canalización obsoleto que non se adapta ao crecemento do concello, que supera xa os 40.000 habitantes.
“Recentemente cambiouse o xerente de Aquaoleiros, cuestionando a súa elección inicial, pero non coñecemos ningún plan concreto para afrontar os graves problemas que sofren os nosos veciños”, explicou Silva. A portavoz criticou que, mentres os reventóns, vertidos e a turbidez da auga son habituais, o alcalde prefire investir millóns no edificio multiusos, “un proxecto que nin é urxente nin necesario”.
O PP insistiu na importancia de priorizar a mellora da rede de abastecemento e saneamento, ante o descontento xeral dos veciños que sofren as consecuencias da mala xestión de Aquaoleiros desde a súa creación hai dous anos.