O PP de Oleiros alerta de que unha nova urbanización con 374 vivendas agravará os atascos entre Lamastelle, Montrove e Nós
O Partido Popular de Oleiros denunciou que o desenvolvemento dunha nova urbanización de 374 vivendas entre Lamastelle, Montrove e Nós agravará os problemas de tráfico que xa soporta esta contorna do municipio. A formación considera que o incremento de poboación e vehículos previsto non vai acompañado das infraestruras necesarias para absorber a nova mobilidade.
Segundo os populares, a promoción residencial desembocará en dúas vías que xa rexistran importantes retencións nas horas punta, especialmente nos accesos á N-VI, polo que estiman que o novo desenvolvemento podería incorporar arredor de 500 vehículos máis á circulación diaria. O PP sostén que o principal problema atópase na capacidade do viario existente, en especial na zona da ponte que comunica este ámbito coa estrada nacional, onde aseguran que se producen os maiores colapsos.
A formación tamén sinala que o propio crecemento urbanístico está obrigando a reforzar outros servizos municipais. Entre eles, cita a ampliación do depósito de auga de Sarro e as actuacións de mellora na rede de saneamento que está a executar o Concello, ao considerar que as infraestruturas actuais xa presentaban limitacións para asumir un maior número de usuarios.
Con todo, o PP critica que non exista unha planificación paralela en materia de mobilidade. 'Seguimos co carro diante dos bois', sosteñen os populares, que reclaman resolver previamente os problemas de circulación antes de autorizar novos desenvolvementos residenciais.
A promoción forma parte do crecemento urbanístico previsto para a zona de Montrove e Lamastelle, un ámbito que nos últimos anos concentrou distintos proxectos residenciais e actuacións de urbanización, acompañados tamén da execución de novas infraestruturas de abastecemento eléctrico e doutros servizos necesarios para atender o aumento de poboación.