O Partido Popular de Culleredo, a través da súa portavoz Izaskun García, denunciou a demora do Concello na execución dos traballos de desbroce nas zonas rurais e forestais do municipio, o que está a xerar unha situación de alto risco ante a posibilidade de incendios forestais, especialmente durante o verán, cando as altas temperaturas agravan o perigo.
A licitación para estes traballos presentouse en abril, pero o contrato coa empresa adxudicataria non se asinou ata o 12 de agosto. “Coñecendo os prazos administrativos, non entendemos como non se licita en xaneiro para garantir o comezo dos traballos antes do verán”, afirmou García. Esta situación, segundo a líder popular, xa provocou que moitas estradas e zonas rurais de Culleredo estean nun estado “de auténtica selva”, o que non só afecta á seguridade, senón tamén á calidade de vida dos veciños.
Izaskun García sinalou que reciben "a diario queixas de veciños realmente preocupados porque a maleza o invade todo e desde o Concello non reciben ningunha resposta". A situación é especialmente crítica en núcleos de poboación preto de zonas forestais, como A Zapateira, onde os veciños levan meses reclamando a intervención do Concello, sen éxito.
Ademais, outro motivo de preocupación é o peche da empresa que prestaba o servizo de mantemento de parques e xardíns. Esta situación, combinada coas altas temperaturas, está a provocar a proliferación de insectos en zonas como o paseo do río Trabe en Acea de Ama, onde xa se reportaron problemas serios de picaduras a nenos e maiores que utilizan o paseo.
O PP de Culleredo reclama unha resposta inmediata por parte do goberno municipal para poñer fin a estas situacións que poñen en risco a seguridade e o benestar dos veciños.
