Política

Ceci Vázquez denuncia os atrasos reiterados do goberno de María Barral e propón abrir unha negociación cos grupos políticos para definir as contas municipais

O Grupo Municipal do Partido Popular de Betanzos presentará unha moción no Pleno para instar ao goberno local, encabezado pola alcaldesa María Barral, a axilizar a elaboración e tramitación dos orzamentos municipais de 2027. Os populares reclaman que as contas se aproben dentro dos prazos legais e entren en vigor o 1 de xaneiro do próximo ano.

A voceira do PP, Ceci Vázquez, critica que, desde a chegada de María Barral á Alcaldía, os orzamentos non entraron en vigor ao comezo do exercicio correspondente. A formación lembra que mesmo en 2025 foi necesario recorrer á prórroga orzamentaria e considera que esta situación deixou de ser un atraso puntual para converterse nunha dinámica que se repite ao longo dos anos.

A proposta popular apóiase na normativa reguladora das facendas locais. En concreto, o artigo 168.4 do Real Decreto Lexislativo 2/2004 establece que o proxecto de orzamento xeral, informado pola Intervención e acompañado da documentación correspondente, debe remitirse ao Pleno antes do 15 de outubro do ano anterior ao da súa aplicación. Pola súa banda, o artigo 169.2 fixa como límite para a aprobación definitiva o 31 de decembro.

Vázquez subliña que o orzamento é a principal ferramenta para organizar a economía municipal, establecer as prioridades de gasto, programar investimentos e garantir o financiamento dos servizos públicos. Por iso, considera que o cumprimento dos prazos non debe tratarse como un simple trámite administrativo, senón como unha obriga fundamental do goberno local.

A voceira popular advirte de que os atrasos na aprobación das contas dificultan a planificación económica e a execución dos investimentos previstos. Segundo defende o PP, tamén condicionan a posibilidade de impulsar políticas fiscais destinadas a reducir a carga tributaria da veciñanza e xeran incerteza na xestión dos recursos municipais.

A formación recoñece que a normativa contempla a prórroga automática do orzamento anterior cando o novo non está en vigor ao comezo do exercicio. Porén, considera que este mecanismo debe garantir a continuidade administrativa e non converterse nunha alternativa habitual á elaboración e aprobación das contas nos prazos ordinarios.

O PP sinala, ademais, que traballar cun orzamento prorrogado pode obrigar a tramitar modificacións de crédito para atender necesidades ou actuacións que non estaban previstas nas contas anteriores. Esta situación, sostén, pode complicar a programación de novos investimentos e programas municipais e reducir o tempo dispoñible para executar as iniciativas previstas.

Na moción, os populares tamén destacan a importancia de que a elaboración do orzamento sirva para fomentar o diálogo, a transparencia e a participación dos distintos grupos políticos. Neste sentido, propoñen que a documentación económica se facilite coa suficiente antelación para que as formacións representadas na Corporación poidan estudar as contas e formular propostas.

A iniciativa inclúe tres acordos. O primeiro consiste en instar ao goberno municipal a cumprir os prazos legais para elaborar, tramitar e aprobar o orzamento de 2027, co obxectivo de que entre en vigor o 1 de xaneiro. O segundo pide á Alcaldía que entregue a documentación aos grupos políticos con tempo suficiente e abra un proceso de diálogo e negociación para estudar medidas que melloren os servizos públicos, os investimentos e a atención ás necesidades da cidadanía. O terceiro propón que a alcaldesa ou a persoa en quen delegue se encargue de executar os acordos que poida adoptar o Pleno.