O PP de Betanzos reclama a reposición dos bancos de cantería na praza García Irmáns
O Partido Popular de Betanzos esixe ao goberno local a reposición dos bancos de cantería do entorno da Fonte da Diana Cazadora, situada na praza García Irmáns, tradicionalmente coñecida como a praza do Campo. Operarios municipais retiraron hoxe estes bancos, considerados un elemento característico desta zona desde principios do século XX, o que xerou un importante malestar veciñal.
A portavoz popular, Cecilia Vázquez, acusou ao equipo de goberno de destruír o patrimonio artístico do municipio con cada nova intervención. “Non importa se a actuación é pequena ou grande, o resultado sempre é o mesmo: a perda patrimonial”, afirmou.
Ademais, criticou a decisión de instalar bancos modernistas ao redor da fonte, en lugar de nos seus lugares orixinais. Segundo Vázquez, esta nova disposición resulta esteticamente cuestionable e supón un obstáculo para o tránsito, especialmente para as persoas con mobilidade reducida.
O PP considera que estas decisións non reflexionadas deterioran a calidade do espazo público e comprometen a accesibilidade. Por este motivo, solicita que se devolva a praza ao seu estado orixinal, recuperando tanto os bancos de cantería como a localización inicial dos bancos modernistas.