O PP de Betanzos leva a pleno a mellora da seguridade viaria na estrada provincial que atravesa Caraña, A Xerpe e Touriñao
![Imaxe recurso dunha estrada](https://acorunaxa.com/wp-content/uploads/2024/06/Imaxe-recurso-dunha-estrada.jpg)
O Partido Popular de Betanzos levará ao pleno, deste martes, unha moción na que se insta á Deputación da Coruña a realizar as obras necesarias para eliminar as zonas de risco de accidente na estrada DP-0906 ao seu paso polos núcleos de Caraña, A Xerpe e Touriñao. Cecilia Vázquez comentou que se trata dun vial, cun elevado tránsito de vehículos, con graves deficiencias de seguridade, debidas ao lamentable estado do firme e a inexistencia de paso de peóns.
Ademais destas carencias de seguridade, a elevada velocidade á que circulan algúns autos aumenta o risco para os peóns, comentan os veciños. Peóns que son persoas de idade avanzada e nenos usuarios do transporte público e escolar na súa maioría, que ven obrigados a cruzar a calzada sen sinalizar para acceder ás paradas.
Con isto, Cecilia Vázquez instará así, unha vez máis ao goberno local de Betanzos, para que dea traslado á Deputación da urxente necesidade de proceder a reparar o firme, beirarrúas e sinalizar con pasos de peóns nas inmediacións das paradas de bus. A instalación dun sistema de control de velocidade, é outra das propostas recollidas na moción dos populares coa intención de que a Deputación a faga súa e comprométase coa seguridade dos veciños. Os populares pretenden ademais que a institución provincial reforce a seguridade viaria do tramou adxacente á intersección coa estrada que leva ao Cemiterio Municipal.