O PP da Coruña insta a Inés Rey a consensuar coa veciñanza as obras das rúas Padre Sarmiento e San Mateo
O portavoz do Grupo municipal Popular na Coruña, Miguel Lorenzo, acompañado polos concelleiros Antonio Deus e José Ramón Amado, escoitou queixas de veciños das rúas Padre Sarmiento e San Mateo, na contorna do Parque de Sta. Margarita, pola realización de obras municipais sen consenso que eliminarán prazas de aparcamento.
Lorenzo insta á alcaldesa para acordar esta actuación antes de que comece, que elimina 2 de cada 3 aparcamentos en superficie, para que non suceda o mesmo que na praza de Pintor Laxeiro ou nas Casas de Franco, entre outras, onde cambiou o proxecto tras as protestas veciñais na rúa.
Nesta zona da cidade existe unha gran densidade de poboación e unha vez máis, o Goberno municipal vai executar unha obra que afectará á vida cotiá dos veciños e que vai provocar a desaparición de máis de 50 prazas de aparcamento sen adoptar medidas alternativas, ao pasar das 75 actuais a 25.
Desde o PP instan a Inés Rey a dialogar e acordar cos veciños as obras antes do seu comezo, xa que a execución das mesmas é inmediata ao estar adxudicada por importe de 825.220 euros e o contrato asinado desde o mes de abril cun prazo de execución de 10 meses.