O PP da Coruña cuestiona "a ausencia dun dispositivo de seguridade ante a chegada dos ultras do Málaga"
O Grupo Popular preguntará a Goberno municipal e Subdelegación pola total falta de planificación e dun dispositivo especial adecuado ante a coñecida chegada o sábado de douscentos radicais do Málaga.
“O venres a Unidade de Intervención Policial de Málaga deu aviso de que viñan para aquí dous centenares de seareiros violentos”, e o partido fora declarado de alto risco, a pesar do cal “non se programou un servizo especial para o sábado”, declarou Marcos Franco, secretario xera o do Sindicato Unificado da Policía (SUP) na Coruña.
Os radicais pasearon pola cidade ás súas anchas a serán do sábado, causando desfeitas e sementando o pánico, ante a ausencia dun dispositivo policial a pesar de que o partido fora declarado de alto risco polos antecedentes de rivalidade. Uns incidentes que condenamos e rexeitamos totalmente e agradecemos ás Forzas e Corpos de Seguridade o seu esforzo para evitar que ocorrese unha desgraza a pesar de non contar cos medios suficientes nin humanos nin materiais.
Nin Goberno nin Subdelegación tomaron medidas de seguridade preventivas para a noite do sábado acordes coa coñecida magnitude do risco e os axentes de Policía local e Nacional de quenda habitual foron abandonados á súa sorte por falta de reforzos, tal e como tamén denuncian os sindicatos policiais. Non se reforzaron as quendas de Policía, véndose a cidade envolta en numerosos altercados para os que os axentes, nunha clara inferioridade numérica e con medios precarios, víronse completamente desbordados na noite do sábado.
Os radicais do club andaluz chegaron á cidade o sábado sen que houbese un dispositivo policial de reforzo e control planificado. Os incidentes e desfeitas provocados tiveron que ser atendidos polas 6 patrullas de Policía local e as 3 da Nacional da quenda habitual de noite. Cando chegou o reforzo da UIP os radicais xa abandonaran a cidade.
É evidente que os axentes foron abandonados á súa sorte e que se controlou a situación grazas ao traballo das escasas patrullas que traballaron para iso nese momento e de forma exclusiva nas inmediacións do Estadio de Riazor. Todos os policías de quenda de noite estaban centrados neses incidentes pola nula planificación de seguridade do Goberno municipal e de Subdelegación. Se chega a haber calquera outro incidente na cidade, na que en había dous concertos con considerable afluencia de público, non houbese podidos ser atendido.