O PP da Coruña critica o aumento do orzamento para festas e reclama máis gasto social
O portavoz do Grupo Popular na Coruña, Miguel Lorenzo, reclamou hoxe que as partidas sociais do orzamento municipal de 2025 aumenten, como mínimo, no mesmo porcentaxe que o orzamento para festas, que crece un 18,5%. Este incremento foi aprobado esta mañá de forma extraordinaria e urxente nun consello reitor do Instituto Municipal Coruña Espectáculos (IMCE).
“Exiximos a Inés Rey que destine os mesmos recursos para axudar a quen máis o precisa que para organizar festas. En 2024, setecentos menores quedaron sen Beca Comedor a pesar de ter dereito a ela, e hai lista de espera en programas como Teleasistencia, Talón Restaurante, Axuda a Domicilio ou Comida a Domicilio”, sinalou Lorenzo, criticando as prioridades do Goberno municipal.
O orzamento inicial do IMCE para 2025 ascende a 8.598.000 euros, un 18,5% máis que en 2024, cando era de 7.253.000 euros, o que supón un aumento de 1,34 millóns. Deste total, 7,5 millóns procederán de transferencias directas do orzamento municipal, o que representa un incremento do 21% respecto ao ano anterior.
Miguel Lorenzo lembrou que, a pesar de contar en 2024 co orzamento municipal máis alto da historia, o Goberno local recortou partidas sociais clave: “Reducíronse os fondos para Programas Sociais un 7%, para Emerxencia Social un 9%, para a Renda Social un 20% e para o Bonotaxi outro 20%. É inadmisible que un goberno que se di progresista non atenda as necesidades básicas dos coruñeses máis vulnerables”.
O portavoz Popular tamén subliñou que, aínda que se aprobaron por unanimidade mocións do PP relacionadas cos plans sociais, estas apenas tiveron desenvolvemento práctico. Entre os exemplos mencionou os plans de Saúde Mental, Inclusión Social e Accesibilidade, que “nin están elaborados ou, cando o están, carecen de obxectivos, accións concretas, recursos asignados e cronogramas”.
Lorenzo criticou ademais a falta de coherencia nas políticas do Goberno local. “Por unha banda, presumen de ser un goberno sensible ás demandas sociais, pero por outra destinan máis recursos á celebración de festas que a garantir dereitos esenciais. A Coruña necesita un goberno que estea á altura dos seus cidadáns, non un que só pense na imaxe ou nos titulares”.
Finalmente, o Grupo Popular reiterou o seu compromiso coas políticas sociais e anunciou que seguirá esixindo que o orzamento municipal reflicta prioridades claras a favor dos máis desfavorecidos. “Investir en festas non é incompatible con protexer aos máis vulnerables, pero a xustiza social debería ser sempre a prioridade número un”, concluíu.