O PP critica a Inés Rey pola falta de medidas ante a folga de recollida de lixo na Coruña
![Imaxe do lixo na Courña diante dun supermercado](https://acorunaxa.com/wp-content/uploads/2024/07/Imaxe-do-lixo-na-Courna-diante-dun-supermercado-.jpg)
O viceportavoz do Partido Popular, Roberto Rodríguez, criticou duramente a Inés Rey, alcaldesa da Coruña, pola súa inacción ante a folga de recollida de lixo que xa leva 22 días. Segundo Rodríguez, "Inés Rey non tomou aínda ningunha medida para que acabe a folga antes de que sexa indefinida e se agrave coa calor".
Rodríguez destacou que "un dos problemas da recollida é que non hai contrato desde hai case un ano, como en Nostián desde hai catro, onde tamén hai convocada folga e cuxo futuro está no aire ante a falta de acordo co Consorcio". Esta situación, segundo o viceportavoz, agrava os problemas de xestión dos residuos na cidade.
"Inés Rey dixo que está estudando baixar o recibo do lixo cando haxa folga e que está estudando se se pode declarar a emerxencia sanitaria... volve á súa época de estudante, pero a gobernar hai que vir estudado", criticou Rodríguez, facendo fincapé na necesidade de tomar decisións urxentes. "É momento de tomar decisións, non de estudar porque é un problema de saúde pública. Van 22 días sen recollida de lixo e Inés Rey non tomou ningunha medida para que acabe a folga antes de que a situación se agrave coa calor e de que sexa indefinida".
O viceportavoz tamén subliñou a falta de accións concretas por parte da alcaldesa. "Di o seu portavoz que a alcaldesa está meditando se tomar medidas extraordinarias, ¿a que espera? Díxemolo desde o primeiro día, apoiámola en todas as decisións que tome, pero que tome algunha. Os coruñeses pagamos 1M€ ao mes para que se recolla o lixo".
A situación xerou preocupación entre a cidadanía, con asociacións veciñais convocando unha concentración en María Pita o venres ante a inacción municipal. "Tamén enviou un comunicado a Federación de Comerciantes porque esta situación afecta aos seus negocios", engadiu Rodríguez.
Rodríguez tamén sinalou problemas estruturais no servizo de recollida de lixo, que está sen contrato desde hai case un ano, tras ser anulado polo TSXG o adxudicado polo PSOE en 2020. "Desde entón non se adxudicou a outra empresa nin se licitou un novo. ¿Como vai esixir á empresa que cumpra un contrato que non hai?", cuestionou.
A situación é semellante na planta de tratamento de residuos de Nostián, que está sen contrato desde hai catro anos e onde tamén hai convocada unha folga para os días 18, 23 e 25 de xullo. "A plantilla denuncia un incremento de accidentes e riscos laborais por falta de mantemento. ¿Como vai investir unha empresa que leva máis de catro anos sen contrato e que non sabe que pasará coa planta?", preguntou Rodríguez.
Ademais, Rodríguez destacou a incerteza sobre o futuro da planta de Nostián debido á falta de acordo co Consorcio de As Mariñas, cuxa continuidade non está garantida. "Inés Rey segue sen chegar a un acordo co cliente principal da planta a quen ignorou para os novos pregos e as novas condicións do servizo, como ignora a veciños e oposición en todas as súas decisións", concluíu.