O porto de Santa Cruz será cedido ao Concello de Oleiros trala súa reversión ao Estado
O presidente de Portos de Galicia, José Antonio Álvarez, informou esta mañá na Comisión 8ª de Pesca e Marisqueo sobre os avances no proceso de reversión ao Estado dos terreos portuarios declarados innecesarios para a actividade sectorial, incluíndo o porto de Santa Cruz, en Oleiros. Esta iniciativa busca que a Administración central transfira posteriormente estas áreas aos concellos para o seu uso veciñal, un paso que deberá ser aprobado polo Consello de Ministros.
Segundo explicou Álvarez, a Xunta vén de pechar a delimitación definitiva de varios espazos portuarios en Cangas, Vilanova, Foz, A Guarda e Santa Cruz, sendo este último un caso singular ao abranguer a totalidade da instalación portuaria. Estas propostas serán ratificadas polo Consello Rector de Portos de Galicia no mes de xaneiro, despois do Nadal.
O proceso realizarase por fases para garantir maior axilidade administrativa, dado o seu alto grao de complexidade. En Santa Cruz, a desafectación permitirá que o porto pase a ser xestionado polo Concello de Oleiros, permitindo novos usos en beneficio da veciñanza. Con todo, Álvarez subliñou que a axilidade do Estado será clave para que a transferencia sexa efectiva, xa que hai precedentes de tramitacións similares que se alongaron máis dunha década.