O pleno de Sada aproba as liquidacións dos contratos de auga e saneamento e impulsa a rehabilitación da capela de San Roque
O Concello de Sada celebrou o pleno ordinario correspondente ao mes de xaneiro de 2026, no que se debateron e saíron adiante varios asuntos de xestión municipal e de carácter social.
Entre os puntos aprobados figura a liquidación anual dos contratos dos servizos de auga, saneamento e depuración dos exercicios 2021, 2022, 2023 e 2024. A proposta contou co voto favorable de Sadamaioría, Unidos por Sada, BNG, PSOE e o concelleiro non adscrito, mentres que o PP optou pola abstención.
A sesión tamén aprobou por unanimidade a rehabilitación da Capela de San Roque, unha intervención que, ademais, se vincula ao POS+2026. Neste apartado, o pleno ratificou a proposta do plan provincial: no POS+ principal, destínanse 843.974,42 euros a gasto corrente, e no POS+ complemento resérvanse 376.632,84 euros para a rehabilitación da capela. Neste punto, Sadamaioría, BNG e PSOE votaron a favor, mentres que Unidos por Sada, PP e o concelleiro non adscrito votaron en contra.
No apartado de iniciativas políticas, unha moción do BNG relativa á modificación da ordenanza de talas non chegou a votarse como moción, ao ser tratada finalmente como rogo. Pola contra, si foi aprobada a moción do BNG para garantir un financiamento xusto do Servizo de Axuda no Fogar (SAF), que saíu adiante cos votos de Sadamaioría, Unidos por Sada, BNG e PSOE, e coa oposición do PP e do concelleiro non adscrito.