O plazo para participar na xornada de caza menor de Ordes remata este luns
A Casa da Cultura de Ordes acollerá o venres 8 de maio unha xornada divulgativa sobre o coello de monte e a perdiz rubia, dúas especies clave na caza menor en Galicia. A actividade celebrarase entre as 19.30 e as 21.30 horas e está dirixida a cazadores e cazadoras interesados no futuro destas especies e na súa xestión sostible.
A inscrición é gratuíta e o prazo para anotarse remata este luns 4 de maio, polo que as persoas interesadas dispoñen dos últimos días para reservar praza. O aforo está limitado a 160 participantes. As inscricións poden realizarse a través da Federación Galega de Caza na Coruña, no teléfono 981 702 957 ou no correo coruna@caza.gal.
A sesión contará como relatores con José Antonio Torres García e Carlos Sánchez García-Abad, do departamento de investigación da Fundación Artemisan. A coordinación correrá a cargo de José María Álvarez Villar, presidente da Delegación Provincial da Federación Galega de Caza na Coruña.
O programa inclúe contidos sobre bioloxía e ecoloxía do coello de monte e da perdiz rubia, monitorización de poboacións, xestión do hábitat, control da depredación, caza sostible e técnicas de repoboación. Tamén se presentará o proxecto de recuperación da caza menor en Galicia.
A actividade está vencellada ao Observatorio Cinexético, unha ferramenta de seguimento da fauna silvestre na que participan cazadores e xestores para obter datos útiles sobre a evolución das especies. A iniciativa emprega censos e rexistros de campo para mellorar o coñecemento das poboacións e facilitar unha xestión baseada en información técnica.
Todas as persoas asistentes recibirán un diploma e un agasallo ao remate da xornada. A proposta conta co apoio da Fundación Artemisan e está subvencionada pola Deputación da Coruña.