O pavillón do IES de Viós estreará novo pavimento deportivo tras un investimento de case 97.000 euros
A pista polideportiva do IES de Viós, en Abegondo, está a piques de estrear unha nova superficie deportiva tras unhas obras que buscan mellorar as condicións de uso tanto para o alumnado como para os clubs do municipio. A actuación, que se atopa na súa recta final, conta cun investimento de 96.504,14 euros, financiado con fondos municipais e unha achega de 40.000 euros da Xunta de Galicia.
A principal intervención consiste en substituír o actual chan de formigón por un pavimento deportivo con acabado en tarima, deseñado para ofrecer unha maior comodidade e unha absorción máis uniforme dos impactos. Unha vez colocado, procederase ao marcado das liñas das distintas pistas, que permitirán practicar baloncesto, fútbol sala e balonmán.
O alcalde de Abegondo, José Antonio Santiso, visitou as obras acompañado polo arquitecto municipal para comprobar o avance dos traballos. Segundo a previsión técnica, a intervención rematará nos próximos días, de xeito que a instalación poida volver utilizarse canto antes.
Santiso destacou que a renovación permitirá mellorar a experiencia das persoas usuarias e reducir os riscos asociados á práctica deportiva sobre unha superficie de formigón. O rexedor tamén sinalou que a axuda autonómica se conseguiu tras analizar as necesidades trasladadas pola comunidade educativa e buscar vías de financiamento para atender esas demandas.
Máis melloras no instituto
A renovación da pista súmase a outras actuacións recentes no IES de Viós. Nos últimos meses tamén se reformou a biblioteca, cun investimento aproximado de 60.000 euros para renovar o mobiliario e adaptar o espazo ao estudo e á lectura.
Ademais, no auditorio substituíronse os asentos e as persianas por novos estores, e instaláronse atrís e outros elementos para mellorar os servizos deste espazo.
O Concello destaca que estas intervencións se desenvolveron coa súa participación na tramitación e xestión das axudas autonómicas, co obxectivo de modernizar diferentes instalacións do centro educativo.