O patrimonio mariñeiro de Arteixo sae á rúa cunha exposición itinerante do Centro Mar de Sorrizo
O patrimonio marítimo de Arteixo sae á rúa para achegarse á cidadanía. O Concello puxo en marcha unha nova acción de difusión do Centro Mar de Sorrizo, unha iniciativa que permitirá coñecer a historia e os valores do litoral arteixán a través dunha exposición exterior e itinerante.
A mostra está formada por dous cubos informativos de gran formato que irán pasando por diferentes puntos do municipio. O obxectivo é levar os contidos do proxecto a distintos espazos públicos para facilitar o seu acceso tanto á veciñanza como ás persoas que visitan Arteixo.
A primeira parada da exposición é a praza do Concello, onde poderá visitarse ata o 11 de setembro. A partir desa data trasladarase á Avenida do Balneario, onde permanecerá ata o 25 de setembro.
Os paneis ofrecen un percorrido pola historia do Centro Mar de Sorrizo e polas actividades desenvolvidas no marco do proxecto. A proposta pretende dar a coñecer as súas vertentes educativa e turística e animar á cidadanía a descubrir as posibilidades que ofrece este espazo dedicado á divulgación do patrimonio mariñeiro.
A memoria do mar como protagonista
A exposición vai máis aló da presentación do propio centro e pon o foco na riqueza do patrimonio marítimo de Arteixo. Os contidos recuperan parte da memoria local vinculada ao mar e ao traballo desenvolvido ao longo dos anos arredor da actividade pesqueira e marítima.
A proposta tamén aborda a singularidade xeolóxica da costa arteixá, así como a súa flora e fauna. Entre os elementos divulgativos inclúense información sobre avistamentos de cetáceos e historias relacionadas con naufraxios, xunto con outros aspectos do patrimonio material e inmaterial do municipio.
O Concello sinala que o carácter itinerante da mostra permitirá que os contidos cheguen a un maior número de persoas, levando o proxecto a diferentes puntos de Arteixo en lugar de concentrar toda a actividade nun único espazo.
Un proxecto para recuperar e divulgar o patrimonio pesqueiro
Esta nova acción forma parte do proxecto Mar de Sorrizo: a revitalización do patrimonio cultural pesqueiro e marítimo de Arteixo, unha iniciativa impulsada polo Concello e financiada a través das axudas do GALP Golfo Ártabro Sur, coa participación da Consellería do Mar e do Fondo Europeo Marítimo de Pesca e Acuicultura (FEMPA).
Coa exposición, o Centro Mar de Sorrizo busca saír ao encontro da cidadanía para compartir as historias, a memoria e os valores que forman parte da identidade marítima de Arteixo e contribuír á súa conservación e divulgación entre as novas xeracións.