Infraestructuras

A Deputación da Coruña aprobou o convenio de financiamento para executar unha actuación que incluirá novos xogos, pavimento de seguridade e un deseño inspirado no histórico recinto betanceiro

Betanzos avanza na renovación do parque infantil do Pasatempo tras a aprobación, por parte do pleno da Deputación da Coruña, do convenio de colaboración que permitirá financiar o proxecto.

A actuación contará cun investimento de 300.000 euros, sufragado entre o Concello e o organismo provincial, despois de que a iniciativa non puidese acceder aos fondos europeos Next Generation solicitados inicialmente.

O proxecto contempla a renovación integral da área de xogos, unha das máis utilizadas do municipio. Está prevista a instalación de 20 novos elementos para diferentes idades, entre eles unha estrutura multixogos, un carrusel, xogos de equilibrio, un columpio, unha torre, balancíns, saltadores, estruturas de ponte e escalada e paneis táctiles.

A intervención incluirá tamén a substitución completa do pavimento de caucho de seguridade para mellorar as condicións de uso da instalación.

Ao estar situada no Parque do Pasatempo, a nova área infantil contará cun deseño temático inspirado na obra de Juan García Naveira, con referencias a elementos emblemáticos do recinto como os reloxos mundiais, as cunchas ou as grutas.