O pago no autobús co móbil colle velocidade e encara o seu despregue total este ano en Galicia
A Xunta deu este luns, 20 de abril, en Arteixo un novo paso na expansión da plataforma galega de mobilidade MoBT, a aplicación que permite pagar o billete do autobús a través do teléfono móbil e que xa está activa en 32 contratos de transporte interurbano. O conselleiro de Presidencia, Xustiza e Deportes, Diego Calvo, avanzou que esta solución cobre na actualidade máis do 50% dos desprazamentos interurbanos da comunidade e sinalou que o obxectivo do Goberno galego é completar a súa implantación en toda Galicia antes de finais deste ano.
A ferramenta, financiada con fondos europeos do Mecanismo de Recuperación e Resiliencia, botou a andar hai un ano como proxecto piloto en rutas das áreas de Santiago e do Deza e foi ampliando a súa presenza ata chegar á área metropolitana da Coruña, ás áreas de Pontevedra, do Morrazo e do Salnés, á Mariña lucense e á Terra Chá. Tamén está operativa en varios traxectos de longo percorrido, entre eles os que conectan Ferrol con Ourense e Vigo, Lugo con Vigo e a liña directa entre A Coruña e Lugo. Ata o pasado marzo, a iniciativa superaba xa as 6.000 persoas usuarias rexistradas.
O sistema busca simplificar o acceso ao transporte público e deixar atrás algunhas das xestións habituais ligadas ás tarxetas físicas. Coa aplicación, as persoas usuarias poden pagar no autobús mediante un código QR xerado no móbil, consultar o saldo do seu moedeiro virtual e recargalo en liña, sen necesidade de acudir a unha oficina bancaria nin ao caixeiro. A aplicación está dispoñible para Android e Apple e incorpora tamén outras funcións, como a reserva de servizos baixo demanda, o histórico de viaxes e un buscador avanzado para planificar desprazamentos por toda Galicia.
Na súa intervención en Arteixo, Calvo animou á cidadanía das zonas nas que MoBT xa está en funcionamento a descargala e empregala de forma habitual. A Xunta presenta esta ferramenta como unha das súas apostas para facer máis accesible e eficiente o transporte público e para impulsar unha mobilidade máis conectada e sostible en toda a comunidade.