O Orgullo LGTBI+ encherá A Coruña de memoria, saúde e reivindicación
A asociación ALAS A Coruña presentou a súa programación con motivo do Orgullo LGTBI+ 2026, unha axenda que combina información, cultura, participación comunitaria e defensa dos dereitos do colectivo durante o mes de xuño e os primeiros días de xullo.
As actividades comezarán o 13 de xuño coa presenza da entidade na Festa da Diversidade de Noia, A Berberechiña, onde instalará un posto informativo para achegar á cidadanía os recursos e servizos que ofrece a asociación.
O 16 de xuño celebrarase unha xornada sobre saúde sexual en colaboración co Comité Antisida da Coruña (CASCO). A sesión estará centrada no lecer saudable dentro da comunidade LGTBI+ e será impartida polo psicólogo Juan Bonome.
A programación continuará o 20 de xuño coa proxección da curtametraxe documental 'Querer ser', seguida dun coloquio co seu protagonista, Juan Luis Recio, que compartirá a súa historia de vida e reflexionará sobre os retos que aínda afronta o colectivo.
A semana grande do Orgullo incluirá un obradoiro de elaboración de pancartas o 27 de xuño, aberto ás persoas que queiran participar na manifestación do día seguinte. A marcha do Orgullo sairá o 28 de xuño ás 19.30 horas da praza de Ourense, percorrerá as principais rúas do centro e rematará na praza de María Pita coa lectura do manifesto.
Como peche, ALAS A Coruña celebrará o 3 de xullo unha vixilia homenaxe a Samuel Luiz. O acto terá lugar ás 20.00 horas xunto ao Playa Club e servirá como espazo de memoria e compromiso fronte aos discursos e delitos de odio.