O novo parque comarcal de bombeiros xa está recepcionado para dar servizo desde Morás
O Concello de Arteixo recepcionou este luns o novo parque comarcal de bombeiros, unha infraestrutura chamada a mellorar de forma notable o servizo de emerxencias na comarca. As novas instalacións sitúanse no polígono de Morás e substituirán o actual parque, localizado en Sabón, unhas dependencias que o goberno local considera xa superadas polas necesidades actuais.
A actuación enmárcase no acordo acadado co Consorcio Provincial de Bombeiros a través dun convenio que recolle o traslado do parque comarcal á súa nova localización. O obxectivo é dotar ao servizo dun espazo máis moderno e amplo, adaptado ás demandas operativas e ás condicións de traballo do persoal.
Para facer posible o proxecto, o Concello segregou 4.000 metros cadrados dunha parcela de titularidade municipal no polígono de Morás. Sobre ese solo construíuse o novo parque, un equipamento que contou co visto e prace dos técnicos do Consorcio de Bombeiros antes da súa execución.
O investimento destinado á obra ascendeu a 1,3 millóns de euros. Coa posta a punto destas instalacións, o Concello busca deixar atrás as limitacións do parque actual, situado nunha parcela municipal na que tamén se concentran outros servizos como o departamento de recollida de residuos, obras ou Protección Civil.
A recepción das novas dependencias supón un paso decisivo para a futura entrada en funcionamento do parque comarcal en Morás, chamado a converterse nunha peza clave para reforzar a capacidade de resposta ante emerxencias en Arteixo e na súa contorna.