Infraestructuras

O Concello levaba meses reclamando unha actuación ante o mal estado da calzada, aunque agora insiste en que é necesaria unha rehabilitación integral

As máquinas xa volveron á N-634 ao seu paso por Curtis. O Ministerio de Transportes reactivou os traballos de pavimentación dunha estrada que leva meses no centro das reclamacións do Concello polo seu deteriorado estado e polos problemas de seguridade que estaba provocando.

As reclamacións municipais veñen de lonxe. En xullo de 2025, o Concello xa reclamaba unha reparación integral do tramo da N-634 entre a A-6 e a DP-3204.

A situación volveu situar a estrada no foco a comezos deste ano, cando se denunciaron fochancas, afundimentos e acumulacións de auga en diferentes puntos. O Concello reclamou entón ao Estado medidas urxentes para mellorar a seguridade da vía.

En febreiro chegou unha primeira previsión de maior alcance. A Demarcación de Estradas comunicou que estaba prevista unha rehabilitación integral do tramo comprendido entre os quilómetros 664 e 677, mentres se manterían reparacións puntuais ata que se puidese executar a actuación principal.

Nas últimas semanas, a presión municipal continuou. O alcalde reuniuse co xefe da Demarcación de Estradas e trasladoulle novamente o malestar polo estado da N-634, mentres que o pasado mércores un técnico percorreu a estrada para identificar os puntos máis conflitivos e elaborar un informe coas melloras máis urxentes.

Agora, a reactivación das obras supón un primeiro paso que o Goberno local valora positivamente, aínda que insiste en que o asfaltado por si só non resolve todas as deficiencias da estrada.

A N-634 vertebra Curtis de leste a oeste e conecta Curtis con Teixeiro, ademais de dar servizo ao polígono industrial. O seu deterioro obrigou os condutores a realizar manobras para esquivar os socavóns e provocou queixas por posibles danos nos vehículos.

O Concello continuará seguindo a evolución dos traballos e reclamando as actuacións pendentes, especialmente aquelas destinadas a mellorar a seguridade viaria e garantir unhas condicións adecuadas de circulación nunha das principais vías de comunicación do municipio.