O Mandeo converterase nun gran escenario do remo coa primeira Regata 'Xoia do Mandeo'
O río Mandeo será o escenario o próximo 18 de outubro da primeira Regata 'Xoia do Mandeo', unha nova cita deportiva organizada polo Club de Remo Olímpico do Mandeo en colaboración co Concello de Bergondo. A competición desenvolverase na contorna da praia do Pedrido e permitirá ver de preto o traballo dos remeiros e remeiras de diferentes categorías nunha das zonas máis características do municipio.
A xornada está prevista entre as 9.30 e as 12.30 horas e terá formato de contrarreloxo, con saídas das embarcacións cada minuto. Se a participación é elevada, o intervalo poderá reducirse a 30 segundos para garantir que exista suficiente calado e axilizar o desenvolvemento das probas.
A organización preparou un programa que permitirá competir desde as categorías infantís ata os deportistas absolutos. Os primeiros en entrar na auga serán os infantís, a partir das 9.30 horas, cun percorrido de 2.000 metros. Ás 10.10 horas será a quenda dos xuvenís, mentres que os cadetes comezarán aproximadamente ás 10.40 horas. A categoría absoluta está prevista para as 11.30 horas. Nestes tres últimos casos, a distancia será de 4.000 metros.
As diferentes quendas incluirán modalidades de skiff masculino e feminino e dobres mixtos, permitindo así que a competición reúna diferentes perfís de deportistas. Ademais, o regulamento permite que os participantes poidan competir na categoría inmediatamente superior.
Un percorrido polo Mandeo con saída desde Betanzos e Paderne
Un dos atractivos da cita estará precisamente no percorrido. Por motivos ambientais, a organización tivo que modificar o trazado inicialmente previsto, establecendo finalmente 2.000 metros para a categoría infantil e 4.000 metros para o resto.
Nas probas de 4.000 metros, a saída estará situada á altura do illote situado antes da entrada do porto de Betanzos, na zona de Agrelo. Para os infantís, o inicio estará á altura de Souto, en Paderne. A meta será común para todas as categorías e estará situada fronte á praia do Pedrido, en Bergondo.
O percorrido contará ademais con carrís de subida e baixada separados mediante boias para mellorar a seguridade das embarcacións e evitar posibles accidentes. O regulamento establece tamén unha penalización de 30 segundos para os participantes que incumpran as normas de circulación durante a proba.
Medallas e premios para os clubs
A primeira edición da 'Xoia do Mandeo' contará con medallas para os tres primeiros clasificados de cada categoría. Ademais, a organización entregará dous trofeos especiais ao Mellor Club Feminino e ao Mellor Club Masculino.
Estes recoñecementos decidiranse en función dos puntos conseguidos polos clubs nas diferentes probas. O primeiro clasificado sumará sete puntos, o segundo cinco, o terceiro catro, o cuarto tres, o quinto dous e o sexto un. No caso das embarcacións dobres mixtas, os puntos repartiranse ao 50% entre a clasificación masculina e feminina.
As inscricións permanecerán abertas ata as 23.59 horas do 11 de outubro e deberán enviarse ao correo electrónico olimpicodomandeo@gmail.com. A organización tamén habilita a posibilidade de compartir embarcación sempre que isto non implique atrasos nas saídas nin mestura de categorías.
A reunión de delegados celebrarase de maneira telemática o venres 16 de outubro ás 21.00 horas, coa información de acceso que será remitida previamente aos participantes.
A cita pretende así converter o Pedrido durante a mañá do domingo nun punto de encontro para o deporte base e o remo de competición, achegando ao público unha disciplina que os integrantes do Club de Remo Olímpico do Mandeo practican ao longo de todo o ano.