O Mago Teto leva o seu espectáculo 'GaleRock’N’Magic' a Ordes este venres
A maxia e o rock galego daranse a man este venres, 23 de outubro, en Ordes coa actuación do Mago Teto, que presentará o seu espectáculo 'GaleRock’N’Magic' dentro da programación do Outono Cultural 2026. A función comezará ás 20.00 horas no auditorio da Casa da Cultura e estará dirixida ao público familiar, con recomendación de idade a partir dos seis anos. A entrada será gratuíta ata completar a capacidade da sala.
A proposta combina ilusionismo, humor e música en directo nunha viaxe pola historia do rock feito en Galicia. O espectáculo recupera temas de bandas actuais e grupos emblemáticos como Siniestro Total e Los Suaves, ademais de cancións populares vinculadas ao Xabarín Club, que forman parte da memoria musical de varias xeracións.
Os trucos de maxia e as grandes ilusións funcionan como fío condutor das interpretacións musicais, nun formato que busca achegar o rock galego ao público a través dunha experiencia escénica dinámica e participativa.
Nesta ocasión, o Mago Teto, nome artístico de Héctor Guerra, estará acompañado por Ramón Orencio á guitarra e Fernando Risco á batería. A combinación de música en directo e números de maxia converte o espectáculo nunha proposta pensada para gozar en familia.
'GaleRock’N’Magic' recibiu o Premio do Público no Festaclown 2025. A actuación forma parte das actividades culturais promovidas polo Concello de Ordes durante o outono, cunha programación que busca achegar diferentes propostas artísticas á veciñanza.