O Halterofilia Cambre consolídase na elite estatal e mantén vivo o soño do podio
O Club Halterofilia Cambre continúa asinando unha tempada histórica na Liga Nacional 2026. Tras a publicación das puntuacións oficiais da segunda xornada, o equipo feminino absoluto mantense no cuarto posto da División de Honra, a máxima categoría estatal por equipos, con 2.283,56 puntos. Só o Atlético Club Gandia, Anaitasuna e Molins de Rei figuran por diante das cambresas.
O resultado confirma o crecemento dun club que apenas conta con cinco anos de vida e que compite fronte a entidades de grandes cidades de toda España. O mérito é aínda maior tendo en conta que Cambre é un concello de menos de 25.000 habitantes, segundo o INE.
A falta de dúas xornadas para o remate da liga, o conxunto feminino dirixido por Francisco García Pereiro mantén aberta a pelexa polos postos de podio nunha competición con máis de 110 equipos femininos absolutos entre as diferentes divisións, segundo destaca o propio club.
O equipo masculino absoluto tamén mantén intacto o seu gran obxectivo da tempada. O Halterofilia Cambre ocupa a terceira posición en Primeira División masculina con 3.197,52 puntos, por detrás do C.H. Aranjuez e de Anaitasuna. A súa vantaxe sobre o cuarto clasificado, o C.H. Sagunto, é de algo máis de 20 puntos.
Esa terceira praza ten un valor especial, xa que as bases regulamentarias da Real Federación Española de Halterofilia establecen que os tres primeiros equipos de Primeira División ascenden á División de Honra. Se o Cambre consegue manter esa posición ata o final da liga, dará o salto á máxima categoría estatal masculina.
Parte desas puntuacións chegaron a través das marcas conseguidas no Campionato de España Máster de Halterofilia, celebrado do 10 ao 12 de abril en El Ejido, Almería. A representación cambresa completou unha actuación moi destacada, con varios títulos nacionais e postos de honra.
Javier Rodríguez proclamouse campión de España na categoría M30 de máis de 110 quilos. O levantador galego sumou 335 quilos no total olímpico, con 148 en arrancada e 187 en dous tempos, e liderou tamén a clasificación do seu grupo de idade.
Na competición feminina, Aida Ramos foi campioa de España na categoría W30 de menos de 77 quilos, cun total de 186 quilos, mentres que Paula Vilchez tamén logrou o título estatal na categoría W30 de menos de 63 quilos, con 168 quilos. Nesa mesma categoría, Nerea Oya acadou o subcampionato de España cun total de 162 quilos.
Ademais, Aida Ramos e Paula Vilchez foron primeira e segunda na clasificación xeral do grupo W30, unha mostra máis do peso do Halterofilia Cambre dentro da competición máster feminina.
O club tamén destacou os resultados acadados na competición valedeira para a segunda xornada da Liga Nacional disputada no pavillón Os Campóns, en Sigrás. Segundo os datos facilitados pola entidade, Eduarda Souza e Xiana Pérez Brión, ambas do Halterofilia Cambre, ocuparon os dous primeiros postos do podio feminino.
Na categoría masculina, o dominio local foi total. Asier Blanco rematou primeiro, Víctor García de Val foi segundo e Víctor López completou o podio, todos eles representantes do Halterofilia Cambre, segundo informou o propio club.
Cos dous equipos absolutos situados na zona alta das súas ligas, o Halterofilia Cambre encara o tramo decisivo da tempada cun dobre reto: pelexar polo podio feminino na División de Honra e asegurar o ascenso masculino á elite da halterofilia española.