O goberno de Cambre busca consenso coa oposición para aprobar un orzamento de 21,2 millóns de euros
O goberno de Cambre presentou o proxecto de orzamentos para 2025, cunha contía total de 21.244.613,19 euros. Este documento, xa enviado aos grupos da oposición, será discutido mañá, martes 17 de decembro, na que será a cuarta reunión de negociación entre o executivo local e os partidos PP, BNG e AV. Este proceso busca incorporar as achegas da oposición e alcanzar un acordo que permita sacar adiante as contas municipais.
Os orzamentos centran os seus esforzos nos capítulos de gastos de persoal e gastos correntes en bens e servizos, que absorben a maior parte do montante económico. En persoal, que representa o 37,47% do total, prevese a dotación de técnicos A1 para as áreas de Secretaría e Intervención, así como partidas destinadas á nova Relación de Postos de Traballo e a implementación da Carreira Profesional, demandas históricas dos sindicatos. A pesar da negativa recente da oposición a transformar un posto en técnico superior de contratación, o goberno continúa explorando alternativas para fortalecer estas áreas esenciais.
Por outra banda, o capítulo de gastos correntes en bens e servizos, que supón o 44,75% do orzamento, enfócase en regularizar os contratos actualmente en situación precaria. Entre as prioridades están os servizos de axuda no fogar, limpeza de instalacións municipais e zonas verdes, que serán estructurados a través dun plan anual de contratación. Este plan, pioneiro no concello, calendarizará de xaneiro a decembro as licitacións necesarias para servizos, obras e eventos, co obxectivo de mellorar a xestión e cumprir os prazos establecidos.
En canto ao capítulo de investimentos, destínanse 2.336.977,29 euros a pequenas actuacións distribuídas por todo o concello, incluíndo a mellora da rúa Lagoa, a reurbanización da mazá 3 en A Barcala e proxectos en O Temple, como a renovación da rúa Abeleiras e da praza Caso Cortines. Tamén se abordarán actuacións relacionadas con alumeado público, arranxo de camiños, mobiliario e sinalización viaria. Estas intervencións, moitas delas financiadas a través do POS da Deputación, buscan dar resposta ás demandas veciñais.
A alcaldesa María Pan destacou a importancia de priorizar proxectos máis pequenos que beneficien ao maior número de persoas. Pola súa parte, o edil de Urbanismo, Juan González Leirós, expresou a intención de abordar obras de maior envergadura, como o salón de actos da biblioteca, nunha etapa posterior. O concelleiro de Economía e Facenda, Daniel Mallo, subliñou a necesidade de avanzar nas negociacións para levar o proxecto orzamentario ao pleno de xaneiro e afrontar os retos de 2025.
Mallo lembrou que o pasado 11 de decembro se enviou a documentación á oposición, aclarando que algunhas das súas demandas, como a construción de rotondas en vías de titularidade provincial e autonómica, exceden as competencias municipais. Finalmente, María Pan fixo un chamamento á oposición para que valore o proxecto obxectivamente, deixando de lado intereses partidistas e priorizando o benestar dos veciños e veciñas de Cambre.