O Galia domina o trofeo de patinaxe artística en Ordes cun pleno case absoluto nos podios
A patinaxe artística volveu converterse nun dos grandes focos deportivos da fin de semana en Ordes. O pavillón Castelao I reuniu este domingo 19 de abril a máis dun cento de patinadores e patinadoras de entre 2 e 16 anos nun trofeo que deixou unha imaxe clara do peso que segue tendo esta disciplina no municipio, con bancadas cheas e un ambiente entregado durante toda a mañá.
A competición contou coa participación do Club Patinaxe Galia de Ordes, anfitrión da xornada, ademais do club Val do Dubra, o Club Conxuro da Laracha e tamén representación do Club Coruxo. Sobre a pista, os deportistas foron sucedéndose nas distintas categorías nunha mañá marcada polo nivel das actuacións e pola resposta do público.
Se houbo un nome propio na cita foi o do Club Patinaxe Galia. As súas patinadoras acapararon practicamente todos os podios do torneo e dominaron con claridade a clasificación nas categorías de base. Só a categoría absoluta escapou ao control do conxunto ordense, cun dobrete do Club Coruxo encabezado por Mónica Insua, seguida de Elena Oliveira.
No resto das probas, o dominio do Galia foi total. En categoría cadete, Irene Raña subiuse ao primeiro caixón, por diante de Iris Moar e Sara Martínez. En infantil de segundo ano, María Rey logrou a vitoria, con Sara del Río en segunda posición e Martina Paz en terceira. En infantil de primeiro ano, Sofia Iglesias rematou primeira, seguida de Eva Quintana e Elena Rodríguez.
A concelleira de Deportes, Ana Soneira, foi a encargada de entregar as medallas nunha xornada que serviu tamén para volver poñer en valor o traballo de base que se realiza arredor da patinaxe artística en Ordes.
A atención está posta xa na próxima gran cita. Será o 9 de maio, cando o pavillón Castelao I acolla a exhibición de clausura das actividades extraescolares, na que arredor de 200 nenos e nenas volverán calzar os patíns para amosar o aprendido ao longo do curso.