O fútbol praia de Sada prepara unha edición de récord nas Delicias con ata 500 participantes
A Praia das Delicias volverá converterse este verán nun gran escenario deportivo coa celebración da novena edición do Torneo de Fútbol Praia, unha cita xa consolidada no calendario estival da comarca e que este ano medra ata acadar unha capacidade máxima de 500 participantes.
A competición desenvolverase do 5 ao 9 de agosto e estará organizada conxuntamente polo Concello de Sada e a Sociedade R.C. e D. de Sada, que abriu este mércores o prazo de inscrición. O torneo, centrado especialmente no deporte base, reunirá durante varios días a centos de nenos e nenas nunha proposta que combina actividade física, convivencia e ambiente de verán nun dos areais máis concorridos do municipio.
Tras superar os 300 participantes en edicións anteriores, a organización reforzará nesta ocasión os medios técnicos e loxísticos para dar resposta ao crecemento da cita. Unha das principais novidades será a incorporación de dúas novas porterías, o que permitirá disputar partidos en tres campos de xogo ao mesmo tempo.
O Concello asumirá diferentes actuacións necesarias para o desenvolvemento do torneo, como a tramitación dos permisos ante Demarcación de Costas, a instalación das porterías e dun graderío portátil na praia, a cobertura do seguro de accidentes das persoas participantes e a entrega de medallas, trofeos e agasallos.
Tamén se instalarán fontes de auga en colaboración con Veolia, unha medida pensada para mellorar a atención aos participantes e avanzar cara a un evento máis sostible. A Concellería de Deportes farase cargo ademais doutras partidas vinculadas ao material deportivo, arbitraxes e necesidades organizativas.
Pola súa banda, a Sociedade R.C. e D. de Sada xestionará as inscricións, a organización deportiva da competición e o correcto funcionamento do torneo durante as cinco xornadas.
A cita volverá poñer o foco no deporte base e na participación da mocidade, ao tempo que contribuirá á dinamización social e económica de Sada en plena tempada estival. Co seu crecemento ata os 500 participantes, o Torneo de Fútbol Praia das Delicias reforza o seu papel como unha das grandes actividades deportivas do verán sadense.