O festival Intersección regresa á Coruña con cinco días de cinema contemporáneo e dúas grandes apostas internacionais
A Coruña volverá converterse en outubro nun punto de encontro para o cinema contemporáneo con motivo da novena edición de Intersección, Festival Internacional de Cine da Coruña, que se celebrará do 13 ao 17 de outubro.
A menos dun mes do comezo, o festival xa avanzou algunhas das principais propostas da súa programación, que volverá poñer o foco nas linguaxes máis innovadoras do cinema de autor e na creación audiovisual contemporánea.
Nesta edición, Intersección reforza a súa dimensión internacional con dous focos dedicados a Square Eyes e Eva Giolo, dúas propostas moi diferentes que permiten achegarse a distintas formas de entender e crear cinema na actualidade.
Cinema de autor con ollada internacional
Con sede en Viena, Square Eyes leva máis dunha década traballando na circulación internacional de filmes de autor afastados dos circuítos máis convencionais. A selección que chegará á Coruña abordará cuestións como a desigualdade laboral, a intelixencia artificial, a crise climática, as identidades, a violencia dixital ou os modelos actuais de ocio e consumo.
Entre as películas seleccionadas están 'Daria's Night Flowers', 'Stone of Destiny', 'L'mina' e 'Their Eyes', que poderán verse por primeira vez en Galicia despois de pasar por destacados festivais internacionais e nacionais.
As obras achegan historias e realidades diversas, desde a minería informal en Marrocos ata o traballo invisible que sustenta determinados sistemas de intelixencia artificial ou as consecuencias ambientais do turismo de masas.
Cinco películas para descubrir o universo de Eva Giolo
A segunda das grandes propostas anunciadas ten como protagonista a artista Eva Giolo, cuxa obra se move entre o cinema, o vídeo e a instalación. A súa creación presta especial atención á experiencia feminina e utiliza recursos documentais e experimentais para explorar cuestións relacionadas coa intimidade, a memoria e a linguaxe.
Intersección reunirá cinco obras rodadas en 16 mm que percorren a súa filmografía entre 2019 e 2024. A selección inclúe 'A Tongue Called Mother', 'Flowers Blooming in Our Throats', 'The Demands of Ordinary Devotion', 'The Advantage of Lying On The Floor' e 'Becoming Landscape'.
A través destas pezas, Giolo aborda temas como a pertenza, a familia, a maternidade, o traballo, o esgotamento e a relación co territorio e coa paisaxe. Entre as obras seleccionadas figura 'Flowers Blooming in Our Throats', nomeada aos European Film Awards.
O foco permitirá ademais ver algunhas destas creacións por primeira vez en España e Galicia. A presenza da artista estenderase ao programa formativo cunha masterclass en colaboración con CREA, Asociación Galega de Profesionais da Dirección e Realización.
Unha identidade visual inspirada na mitoloxía
A novena edición tamén estrea identidade visual, deseñada polo estudio Donauta, da Guarda. A proposta gráfica parte do propio concepto de intersección como un punto no que diferentes elementos se encontran para dar lugar a algo novo. Esta idea trasládase á creación de figuras mitolóxicas híbridas, que funcionan como representación da filosofía do festival.
A organización busca así reflectir a capacidade do cinema para dialogar con outras disciplinas, formatos, tecnoloxías e formas de creación e, deste xeito, ampliar os límites da imaxe en movemento.