O festival Autobán regresa á Coruña con dous días de fanzines, cómic e creación independente
A Coruña volverá converterse esta semana nun punto de encontro para os amantes do cómic, a ilustración e a autoedición coa celebración da 12ª edición de Autobán, o festival coruñés dedicado aos fanzines e á banda deseñada independente. A cita desenvolverase o venres 14 e o sábado 15 de agosto no Circo de Artesáns e na Praza de San Andrés.
A programación reunirá a preto dun centenar de creadoras e creadores, que terán a oportunidade de amosar e vender as súas publicacións e proxectos no mercado de autoedición. A proposta combina actividades para diferentes públicos con música, presentacións, obradoiros e encontros arredor da creación gráfica.
O programa arrancará o venres 14 no Circo de Artesáns. Ás 17.30 horas terá lugar a entrega do III Premio Autobán ao Mellor Fanzine Galego 2025-2026. Posteriormente, ás 18.00 horas, chegarán as presentacións rápidas de proxectos de Autobán e, ás 19.30 horas, unha das actividades máis características do festival: o Combate de Debuxantes.
O sábado 15, a actividade trasladarase á Praza de San Andrés. Desde as 12.00 horas estará aberto o mercado de autoedición, acompañado ao longo da xornada por propostas como un obradoiro infantil de pegatinas, unha nova edición da Foliadabán, sesións de DJ e un obradoiro de fanzines.
A programación continuará pola tarde e rematará ás 21.30 horas co peche do mercado. A xornada terá continuidade cunha festa postAutobán no Bar 13 a partir das 23.30 horas.
Martín Romero gaña o III Premio Autobán
Un dos momentos destacados desta edición será a entrega do III Premio Autobán ao Mellor Fanzine Galego 2025-2026, que recoñece este ano o traballo de Martín Romero pola súa obra Diarios.
O galardón conta cunha dotación económica de 1.250 euros e un trofeo realizado a man pola ilustradora Julia Abalde. O accésit, dotado con 350 euros e diploma, será para Silver Adree (Adriana Soriano) pola obra Antología de un recuerdo.
O certame recibiu 45 propostas, das que 35 foron consideradas válidas. Ademais das obras gañadoras, chegaron á fase final O Campo de Concentración de Lavacolla, de Colective Pipueca; Mi nick ya no era húmeda, de Gemmi Pérez Feijoó (Muller6ollos); Moon Junction, de Anabel Colazo, e O verán que nunca existiu, de Clara Artiaga.
Os fanzines tamén estarán presentes en Viñetas desde o Atlántico
A actividade de Autobán non se limitará ás dúas xornadas do festival. No marco de Viñetas desde o Atlántico 2026, a organización promove tamén a exposición ExpoFanzines 2026, que permitirá consultar unha selección das obras presentadas ao premio.
A mostra poderá visitarse ata o 27 de setembro na Biblioteca de Estudos Locais da Coruña, ofrecendo ao público a oportunidade de achegarse directamente ás propostas da autoedición galega.
Autobán tamén participa na programación de Viñetas desde o Atlántico cun posto na Rúa da BD e actividades relacionadas co III Premio Autobán. Entre elas figura unha presentación cos gañadores, Martín Romero e Silver Adree, moderada por Julia Abalde.
Do primeiro Autobán á súa duodécima edición
O festival naceu en 2014 e ao longo da súa traxectoria foi consolidándose como un dos puntos de encontro da autoedición gráfica en Galicia. En 2023, a iniciativa constituíuse como asociación cultural co obxectivo de impulsar a banda deseñada, a ilustración e a creación independente, ademais de crear redes de apoio entre artistas e proxectos vinculados a estas disciplinas.
Ao longo destes anos, Autobán foi pasando por diferentes espazos da cidade e incorporou propostas como os combates de debuxantes, mercados, exposicións, presentacións e obradoiros. O festival tamén serviu de escaparate para artistas que posteriormente desenvolveron carreiras destacadas no mundo da ilustración e da banda deseñada.
A nova edición manterá así o espírito que caracteriza a cita: dar visibilidade á creación independente e ofrecer un espazo para descubrir novas publicacións, artistas e proxectos afastados dos circuítos editoriais convencionais.