O Encontro Internacional Acampa pola Paz traerá á Coruña un simulacro dun campo de refuxiados en Gaza
Se o obxectivo é reflexionar sobre a violencia, os medos e a morte á que se enfrontan miles de nenos e nenas aos que se lles roubou a infancia, o Encontro Internacional Acampa pola Paz 'Infancia e Mocidade Refuxiada' nesta edición tiña como imperativo mirar cara a Palestina.
Un dos emblemas dos Encontros que anualmente Acampa pola Paz organiza na Coruña é o campo simulado de persoas refuxiadas que se monta nos xardíns de Méndez Núñez, ao redor do cal pivota todo o encontro. Visitas guiadas para público en xeral e para escolares buscan que os visitantes entendan o que pode significar sobrevivir nesas condicións, despois de perdelo todo.
Este ano, a proposta tratará de aproximarse a un campamento gazatí, ou ao que queda deles despois de meses de asedio e bombas israelís. Espazos nos que permanecen hacinados, famentos e sedentos, atrapados mentres a axuda humanitaria está bloqueada a escasos metros. Os entullos como hábitat, como é a atención médica, ou a repartición de comida ou auga, ou esas improvisadas tendas baixo as que dormen trasladarán ao público, por uns minutos, a eses espazos vulnerables nos que as organizacións levan meses prestando apoio e seguridade a unha poboación desprazada forzosamente nestes meses de terror permanente.
O programa do encontro pode consultarse a través da seguinte ligazón.
Minuto de silencio
Nesta ocasión, ademais, outro polo de atracción poderoso emerxerá nos Xardíns durante o desenvolvemento do encontro internacional. Un Memorial en recordo da infancia asasinada en Palestina construído grazas ás doazóns e ao traballo intenso do voluntariado. Centos de simuladas mortajas coas que Acampa pola Paz quere que a cidadanía se asome, polo menos, ao que significa 15.000 nenos e nenas palestinas asasinadas por Israel.
Con todo, o Memorial rende homenaxe, tamén, a calquera das outras vidas de nenos e nenas perdidas en calquera das outras guerras activas no mundo. A infancia sempre é a máis vulnerable. Non empezan as guerras. Non participan. Pero son sempre as vítimas máis fráxiles, máis traumatizadas e as máis insoportables de asumir en calquera conflito. Fronte ao memorial, o domingo 9 de xuño, ás 12.00 horas, celebrarase o Minuto de Silencio, unha concentración unitaria sen máis bandeiras que a dos DDHH, que rede Acampa pola Paz e o Dereito a Refuxio confía en que sexa masiva.
