Cultura

A Casa da Cultura acollerá tres proxeccións os días 9, 16 e 23, todas ás 20.00 horas, con entrada de balde e coloquios coas persoas responsables de cada filme

Abril será en Carral o mes do cine documental galego. A Casa da Cultura converterase de novo no punto de encontro para este xénero coa celebración do 5º Ciclo de Cine Documental Galego, unha cita xa asentada na programación cultural local e que volverá ofrecer tres sesións de interese arredor de realidades sociais, memoria colectiva e creación artística.

A primeira proxección chegará o xoves 9 con Crónicas dun non, un traballo que afonda no movemento da insubmisión a través da experiencia persoal do seu director, Fernando Rodríguez Gómez 'Peñaño'. O documental revisa a negativa de moitos mozos, a partir de 1989, a realizar o Servizo Militar Obrigatorio e a Prestación Social Substitutoria, e faino desde unha ollada íntima e tamén xeracional. Tras a sesión, o público poderá participar nun coloquio co director.

Unha semana despois, o 16 de abril, será a quenda de Onde máis doe, de Manane Rodríguez. A película aborda a violencia vicaria a partir dun caso extremo no que un home asasina o seu fillo de 11 anos para castigar á nai. O filme pon o foco nas raíces desta violencia e nas preguntas que abre sobre o control, a dominación e a crueldade exercida contra as mulleres a través dos seus fillos. A directora estará presente para introducir a proxección e conversar coas persoas asistentes.

O ciclo pecharase o xoves 23 con Basal, un docudisco centrado na cantautora Ugia Pedreira, coñecida como A Pedreira, e na súa filla Lúa Awel, que ten parálise cerebral e mantén unha relación fonda coa música. A proposta, de carácter íntimo e sensorial, percorre desde sesións de Feldenkrais en Donostia ata a participación de Lúa na gravación do álbum que dá nome ao filme. Esta sesión chega grazas á Deputación da Coruña.

Todas as proxeccións comezarán ás 20.00 horas e terán entrada de balde ata completar a capacidade da sala. A programación conta ademais coa colaboración da Rede de Normalización Lingüística da Xunta de Galicia.

Con esta quinta edición, o ciclo reforza a presenza do documental galego na oferta cultural e abre en Carral unha xanela para ver producións que adoitan quedar fóra dos circuítos habituais de exhibición, nun momento no que este formato gaña cada vez máis espazo dentro da creación audiovisual.