O desfile de Entroido contará con 25 comparsas e carrozas
O Entroido coruñés vivirá este sábado un dos seus actos máis multitudinarios co tradicional desfile de comparsas e carrozas. Nesta edición hai inscritas un total de 25 asociacións da cidade e de diferentes puntos de Galicia, das que 21 que optarán aos premios do concurso.
O desfile comezará o seu percorrido ás 17.30 horas na rúa de San Andrés, que permanecerá pechada desde as 12.00 horas para a preparación das carrozas e vehículos de motor. Media hora antes do inicio, o xurado revisará as diferentes formacións. Tras pasar por San Andrés, os participantes atravesarán a rúa de Santa Catalina e desfilarán polo Cantón Grande e a avenida da Mariña, entrando á praza de María Pita por Porta Real. O tráfico desviarase desde a praza de Mina por Juana de Vega a partir das 17.00 horas para o correcto desenvolvemento deste acto.
O xurado avaliará as coreografías e a calidade do vestiario e das carrozas desde as oficinas do IMCE, na Casa Paredes. O Concello ofrece un mínimo de cinco premios en metálico para as modalidades de comparsas na categoría de vestiario, coreografía e orixinalidade, e carrozas. Os premios oscilan entre os 500 e 1.500 euros en función do posto final, ademais de premios á orixinalidade e accésits.
O grupo portugués Kumpania Algazara amenizará o ambiente en María Pita segundo vaian chegando as carrozas e as comparsas cun concerto. Está previsto que a entrega de premios teña lugar ás 20.30 horas e terá lugar no escenario da praza de María Pita. Tras a cerimonia, Kumpania Algazara ofrecerá un concerto, a partir das 21.30 horas.
Comparsas e carrozas participantes no desfile de Entroido deste sábado
- ONCE
- Festarrachada
- Asociación Galega de Teatro Musical
- El justiciero
- Pantaleón
- Bolivia pachá
- Melandrainas
- Kilomberos de Monte Alto
- Bribesly Hills
- Urbilar
- Amigos da Xoldra
- Tarde mal e arrastro
- Monte Alto a 100
- Os Maracos
- Os peixes de Cambre
- Troula Seguido
- Morenada Bolivia sin Fronteras
- Os mismos de sempre
- Os subterráneos
- Malandros
- Los infieles
- Ana Fuentes Candal (Fóra de concurso)
- David Purriños (Fóra de concurso)
- La madriguera de Pichi (Fóra de concurso)
- Estrelas da Noite(Fóra de concurso)