O cultivo do lúpulo en Galicia recibe o aval da Reserva da Biosfera Mariñas Coruñesas
A empresa Cosecha de Galicia, filial de Hijos de Rivera Inversiones Corporativas, e a Reserva da Biosfera Mariñas Coruñesas veñen de asinar un convenio polo cal esta entidade certifica que as plantacións de lúpulo da compañía galega, situadas dentro do territorio da Reserva, cumpren con todos os parámetros de respecto á biodiversidade e ao medio ambiente. Deste xeito, os estándares da UNESCO avalan o cultivo do lúpulo en Galicia con selo de calidade, garantía e orixe, converténdose nun exemplo de desenvolvemento sostible.
Mariñas Coruñesas foi declarada Reserva da Biosfera pola UNESCO en maio de 2013. Abarca un total de 116.724 hectáreas, que representan case o 15% da superficie da provincia da Coruña, repartidas en 17 concellos.
Cosecha de Galicia leva traballando desde 2004 con investigadores e agricultores locais para reintroducir o cultivo do lúpulo no campo galego, reafirmando así o compromiso de Corporación Hijos de Rivera co desenvolvemento autóctono das súas materias primas. Este proxecto xa abrangue outros cultivos como a cebada e a mazá, contribuíndo ao crecemento económico e sostible do rural galego mediante unha estreita colaboración co sector agrícola local.
José María Rivera Trallero, impulsor do proxecto Cosecha de Galicia, destacou que “este convenio é a culminación dun percorrido de máis de 20 anos recuperando o histórico cultivo do lúpulo na nosa terra, consolidándose como un proxecto de valor estratéxico e garantía da súa continuidade. Os nosos proxectos de cultivo en campo combínanse á perfección con iniciativas de alta innovación, cun foco permanente na xeración de impacto positivo e no desenvolvemento das técnicas máis avanzadas e regenerativas”.
Pola súa banda, José Antonio Santiso, presidente da Reserva da Biosfera Mariñas Coruñesas e alcalde de Abegondo, sinalou que “no noso selo de calidade defendemos as prácticas respectuosas co medio como factor diferenciador, e é un orgullo contar coa aposta de Hijos de Rivera, que resulta clave para impulsar o desenvolvemento do territorio”.
Proxecto de recuperación do lúpulo galego
A recuperación do cultivo do lúpulo por parte da Corporación Hijos de Rivera comezou en 2004 como unha forma de render homenaxe ao fundador da compañía, José María Rivera Corral, quen a principios do século XX introduciu este cultivo en Galicia e en España. En 2006, con motivo do centenario da empresa, levouse a cabo unha primeira colleita conmemorativa.
Desde o inicio do proxecto, Cosecha de Galicia traballa en colaboración con entidades como o Centro de Investigacións Agrarias de Mabegondo (CIAM), cultivadores locais e diversas universidades. Actualmente, conta con case 11 hectáreas onde se cultivan numerosas variedades de lúpulo, empregadas tanto para a investigación como para a elaboración de produtos do grupo, como a recentemente lanzada cervexa Lupia ou o Vermut Rivera, que incorpora este ingrediente autóctono na súa formulación.
O proxecto tamén busca mellorar os cultivos en termos de sostibilidade, promovendo a reutilización de residuos vexetais e estudos para optimizar a súa adaptabilidade ao entorno. A través desta iniciativa, Hijos de Rivera reafirma o seu compromiso coas súas raíces, co desenvolvemento do territorio e coa xeración de valor engadido mediante a reintrodución agrícola do lúpulo, coñecido como o “ouro verde” da cervexa.