O corte da auga obrigará a reorganizar servizos no centro histórico de Betanzos
A empresa concesionaria do servizo de abastecemento de auga retomará este luns 27 de abril os traballos de reparación da condución afectada durante a fin de semana na rúa Travesa, no centro histórico de Betanzos. A intervención obrigará a interromper temporalmente a subministración de auga en varias zonas do casco antigo, onde se sitúan rúas como Travesa, Santiago, Pescadería ou a Praza da Constitución.
O corte está previsto desde as 22.00 horas deste luns ata as 3.00 horas do martes 28 de abril. Durante ese período, a veciñanza das rúas afectadas non dispoñerá de servizo de abastecemento mentres se executan os traballos necesarios para arranxar a avaría.
A actuación tamén terá consecuencias na mobilidade. A rúa Travesa permanecerá cortada durante varios días, polo que os servizos de recollida de lixo sufrirán modificacións mentres se manteña a intervención na zona.
As rúas afectadas polo corte de auga son Cantón de Claudino Pita, Porta da Vila, Prateiros, rúa Travesa, rúa Pastel, Sombreireiros, Azogue, Noas, rúa Cerca nos números do 9 ao 23 e do 12 ao 24, Pescadería, rúa Torre nos números do 2 ao 6, Santiago, Roldán, Praza da Constitución e rúa Pastelería.
O Concello lamenta as molestias que poidan ocasionar estes traballos e lembra que a intervención é necesaria para reparar a condución danada e recuperar a normalidade no servizo.