O Consorcio das Mariñas vixilará os vertidos xunto ós contenedores
O Consorcio As Mariñas reforzará as tarefas de vixilancia e control para reducir a presenza de vertidos incontrolados nos oito concellos que forman parte do ente supramunicipal. A medida chega tras detectarse un aumento deste tipo de condutas, especialmente nas zonas próximas aos contedores de recollida ordinaria.
Desde o Consorcio advirten de que o abandono de residuos na vía pública provoca danos ambientais, deteriora o espazo público e xera molestias á veciñanza. Ademais, este tipo de prácticas dificulta o funcionamento normal do servizo de recollida e transporte de residuos, ao saturar os medios dispoñibles.
Para tratar de frear esta situación, intensificaranse os labores de control a través da Brigada Cívica e da Policía Local. O organismo lembra que deixar residuos fóra dos lugares habilitados pode constituír unha infracción administrativa e, nos casos máis graves ou cando se produzan danos ao medio ambiente, mesmo pode derivar en responsabilidade penal.
O Consorcio insiste en que a veciñanza dispón de alternativas gratuítas para desfacerse de mobles, electrodomésticos, colchóns, somieres e outros residuos voluminosos do fogar. A recollida de enseres pode solicitarse chamando ao 981 795 524, onde se indicará o día dispoñible para a retirada en cada municipio.
As persoas que utilicen este servizo deberán deixar os residuos o día anterior na zona de contedores, seguindo as indicacións facilitadas. Ademais, os oito concellos contan con puntos limpos nos que se poden depositar residuos de maior volume ou especialmente contaminantes, como mobles, aparellos eléctricos e electrodomésticos.
Con este reforzo da vixilancia, o Consorcio busca reducir os vertidos ilegais e fomentar un uso correcto dos servizos públicos de recollida, apelando á responsabilidade cidadá para manter limpos os espazos comúns.