O concerto de Judeline na Coruña cambia de localización pola previsión de choivas e tormentas
O ciclo Santa Margarita - As Noites do Parque arrancará esta semana na Coruña cunha modificación na súa primeira cita. A organización decidiu trasladar o concerto de Judeline debido á previsión de choivas e tormentas durante toda a xornada deste mércores.
A actuación, inicialmente prevista dentro da programación do ciclo, celebrarase finalmente na Sala Pelícano, un cambio co que a organización busca garantir o desenvolvemento do concerto en condicións adecuadas e evitar posibles suspensións derivadas da meteoroloxía.
O traslado de recinto non obriga a realizar ningunha xestión adicional a quen xa teña a súa entrada. As localidades adquiridas seguirán sendo válidas para a nova localización.
Judeline chegará á Coruña para presentar o seu novo EP, Verano Saudade. A artista andaluza, nomeada aos Latin Grammy e recoñecida internacionalmente polo seu álbum Bodhiria, será a encargada de inaugurar a programación musical do ciclo.
Valeria Castro actuará o xoves
A programación de Santa Margarita - As Noites do Parque continuará o xoves 27 de agosto coa actuación de Valeria Castro.
A cantante canaria recalará na Coruña dentro da xira de presentación do seu segundo traballo discográfico, el cuerpo después de todo. Castro conta, ademais, cun Premio Ondas e tres Premios da Música Independente. As entradas para os concertos do ciclo continúan dispoñibles online.