O Concello renovará a rede de saneamento nas rúas de Asturias e Loureiro nos barrio dos Mallos e San Pedro de Visma
O Concello da Coruña acometerá dúas intervencións importantes para mellorar a rede de saneamento municipal nas rúas Asturias, no barrio dos Mallos, e Loureiro, en San Pedro de Visma. Estas actuacións, que comezarán a mediados de setembro e se prolongarán durante tres meses, teñen como obxectivo principal renovar os colectores existentes e mellorar a eficiencia na recollida de augas desde a súa orixe.
Na rúa Asturias, a intervención centrarase na intersección coa rúa Vizcaya, onde se instalará un novo colector de PVC que optimizará a recollida de augas fecais, reducindo o risco de atascos e mellorando o sistema de drenaxe. O Concello destinará máis de 46.000 euros a estes traballos, que tamén permitirán actualizar unha infraestrutura que xa necesitaba unha renovación urxente.
Na rúa Loureiro, a rede de saneamento actual, que é de tipo unitario, será substituída por un sistema máis eficiente. Coa instalación de novos colectores de PVC e a separación das augas pluviais e fecais, mellorarase a recollida de augas en orixe, o que redundará nun mellor funcionamento do sistema xeral de saneamento. O investimento nesta actuación ascenderá a case 49.000 euros.
Estas obras en Asturias e Loureiro forman parte dun plan máis amplo de renovación do circuíto de saneamento que o Goberno de Inés Rey vén impulsando dende o seu anterior mandato. Este plan prioriza as intervencións máis necesarias, xa sexa pola antigüidade dos colectores ou para corrixir deficiencias no sistema.
Ao longo deste ano, xa se realizaron intervencións similares en varias zonas da cidade, como na rúa Bugallal Marchesi en Elviña, Ana María Mogás Fontcuberta na Zapateira, e nas rúas Novoa Santos en Catro Camiños e París na Zapateira. Ademais, completouse a primeira fase da creación dunha nova rede separativa no Barrio das Flores e realizáronse melloras na rúa Capitán Juan Varela nos Mallos.
Actualmente, o Concello continúa traballando na mellora da rede de saneamento noutras áreas como a rúa Marsella na Zapateira e Juan Castro Mosquera na Falperra, demostrando o seu compromiso continuo coa modernización das infraestruturas urbanas para mellorar a calidade de vida dos veciños e veciñas da Coruña.