O Concello e a Federación de ANPAS impulsan un programa de actividades extraescolares
O prazo de inscrición para as actividades extraescolares do curso 2026-2027 xa está aberto. A programación, impulsada polo Concello en colaboración coa Federación de ANPAS, volverá ofrecer unha ampla variedade de propostas nos centros educativos co obxectivo de favorecer a conciliación familiar, complementar a formación do alumnado e fomentar hábitos saudables, a creatividade e a aprendizaxe.
O programa, que o pasado curso reuniu a máis de 2.600 participantes, mantén unha oferta estruturada en diferentes ámbitos para dar resposta aos intereses das familias e do alumnado. A alcaldesa, Inés Rey, destacou a vontade de seguir reforzando esta colaboración cos colexios públicos e coa Federación de ANPAS para ampliar unha programación que combina deporte, idiomas, actividades artísticas e educación en valores.
Entre as iniciativas destaca Cóxegas, orientada a facilitar a conciliación durante as primeiras semanas de setembro. As actividades desenvolveranse nos propios centros educativos con xogos, propostas deportivas e dinámicas lúdicas destinadas a promover a convivencia e o desenvolvemento cognitivo, psicomotor e social dos participantes. O prazo de inscrición permanecerá aberto ata o 2 de setembro e as familias beneficiarias da bolsa comedor poderán acceder a unha bonificación do 50 % na cota.
Outra das propostas consolidadas é Arte e Cultura no Centro, un programa que aposta pola creatividade a través do teatro, a expresión corporal, as artes plásticas e outras disciplinas artísticas. As sesións celebraranse dúas veces por semana en horario de tarde e o período de inscrición estenderase ata o 13 de setembro.
Tamén continúa Deporte no Centro, que inclúe modalidades como atletismo, hóckey, fútbol, voleibol ou xadrez, promovendo a práctica deportiva como ferramenta educativa e de transmisión de valores. Xunto a esta iniciativa manterase Idiomas no Centro, centrada na aprendizaxe de inglés e francés mediante actividades participativas que potencian especialmente a comunicación oral.
A principal novidade desta edición será Chorus, un proxecto de formación coral infantil que pasa a formar parte da programación estable tras a boa acollida da súa primeira edición. A iniciativa culminará cun concerto colectivo e estará coordinada por Fernando Briones, director da Orquestra Gaos e profesor do Conservatorio Superior de Música.
Ademais, o Concello mantén aberta a convocatoria das actividades extraescolares adaptadas do Centro de Educación Especial Nosa Señora do Rosario, unha proposta gratuíta dirixida ao alumnado con necesidades especiais que busca favorecer a práctica deportiva e o desenvolvemento de habilidades nunha contorna adaptada e inclusiva.