O Concello de Vilasantar organiza tres obradoiros de beleza e coidado persoal en Présaras
O Concello de Vilasantar continúa coa súa programación de actividades sociais e de ocio e organiza para este mes de novembro tres obradoiros centrados no coidado persoal e a creatividade. Todas as sesións desenvolveranse no local social de Présaras e están dirixidas a diferentes públicos, desde a rapazada ata persoas adultas.
O primeiro será o Taller de Manicura, previsto para o martes 11 de novembro ás 17.00 horas. Nel, as participantes poderán aprender técnicas básicas para coidar e decorar as unllas.
O venres 21 de novembro, ás 18.00 horas, celebrarase a Mini Make Up Party, unha cita pensada para nenos e nenas de entre 3 e 12 anos, na que poderán divertirse con maquillaxe, purpurina e outras sorpresas.
Por último, o martes 25 de novembro ás 17.00 horas terá lugar o Taller de Peiteados, no que se ensinarán técnicas para realizar peiteados con prancha, lisos e ondas.
Estas actividades forman parte do programa 'Corresponsables', promovido pola Xunta de Galicia e o Ministerio de Igualdade, coa colaboración do Concello de Vilasantar.