O Concello de Miño destina 241.500 euros á rehabilitación integral das rúas Barrosa, Carreira e Raxel
A deterioración do firme nas rúas Barrosa, Carreira e Raxel será obxecto dunha actuación integral que o Concello de Miño acaba de sacar a licitación por 241.500 euros. As tres vías forman un eixo continuo de importante tránsito no centro urbano e a intervención pretende mellorar tanto a seguridade como a mobilidade nesta zona.
A actuación será financiada integramente con fondos municipais procedentes do remanente de tesourería. O proxecto contempla unha renovación profunda do firme, despois de que unha inspección previa permitise determinar a orixe dos danos que presentan actualmente estas rúas, entre eles fisuras, afundimentos e perda de capacidade portante na zona central da calzada.
As comprobacións realizadas xunto coa empresa concesionaria do ciclo da auga determinaron que a tubaxe subterránea de pluviais se atopa en bo estado. Segundo o proxecto, os problemas existentes na superficie estarían relacionados coa mala execución e compactación histórica do recheo dunha gabia central, que acabou provocando deformacións no pavimento.
As obras non se limitarán a renovar a capa superficial. Está previsto realizar un fresado do actual firme e colocar cinco centímetros de mestura bituminosa en quente, mentres que na zona central se actuará tamén sobre as capas estruturais. Dependendo das deformacións existentes, renovaranse seis centímetros da capa intermedia e oito centímetros da capa base.
Un dos elementos destacados da intervención será a colocación dunha xeomalla de fibra de vidro antifisuración, destinada a absorber as tensións provocadas polo tráfico e reducir o risco de que volvan aparecer as gretas e afundimentos que afectan actualmente ao firme.
O prazo para que as empresas interesadas presenten as súas ofertas permanecerá aberto ata o 19 de agosto ás 23:59 horas. A actuación permitirá abordar de maneira conxunta o estado das tres rúas, en lugar de limitarse a reparacións puntuais, cunha intervención orientada a mellorar a estabilidade e a durabilidade do pavimento.