O Concello de Curtis e Augas de Galicia estudan actuacións para recuperar a capacidade da presa do Mandeo
Representantes do Concello de Curtis reuníronse esta semana co director de Augas de Galicia, Roi Fernández, para abordar a situación da presa da Castellana, no río Mandeo. Na xuntanza participaron tamén o presidente da Entidade Urbanística de Conservación do Polígono Industrial Curtis-Teixeiro, Luis González, e persoal técnico.
Durante o encontro analizáronse as actuacións necesarias nesta infraestrutura. Entre elas figuran o dragado do encoro e o incremento da súa capacidade de almacenamento, así como outras intervencións para garantir o servizo de abastecemento de auga.
Como resultado da reunión, o Concello de Curtis matizará e mellorará a súa proposta, incorporando as indicacións trasladadas durante a xuntanza. A partir dese traballo, formularase unha proposta de actuación urxente para dar resposta á situación da presa.
A presa do río Mandeo é unha infraestrutura esencial para o abastecemento de auga ao polígono industrial de Teixeiro, pero leva décadas acumulando lodos e sedimentos que reduciron de forma notable o seu volume útil. Esta problemática púxose especialmente de manifesto durante o episodio de seca dos últimos meses, que levou á Xunta a declarar a prealerta por escaseza de auga na cunca do río Mandeo.
O pasado mes de setembro, os empresarios do polígono acordaron por unanimidade solicitar á Administración autonómica traballos de dragado, limpeza e aumento da capacidade da presa. O Concello de Curtis sumouse a esta petición, e a xuntanza con Augas de Galicia supón un paso máis para avanzar nesta demanda compartida.