O Concello de Culleredo leva a Pleno Extraordinario un suplemento de crédito de 499.000 euros para gastos pendentes
Este venres, 8 de agosto, o Concello de Culleredo someterá a pleno extraordinario un suplemento de crédito de 499.283,08 euros para cubrir gastos pendentes de 2023. Esta proposta, que xa fora presentada en decembro pasado, fora rexeitada pola oposición, o que impediu o pagamento de facturas de servizos realizados por provedores.
O suplemento abarca diversas áreas, incluíndo cultura, educación, deporte, festas e servizos. Entre os gastos que se buscan abonar figuran o mantemento de instalacións deportivas e educativas, así como gastos en festas patronais, actuacións musicais, representacións teatrais e actividades infantís.
O pleno tratará formalmente dous puntos: a incorporación do crédito procedente do remanente de tesouraría e o recoñecemento extraxudicial das obrigacións, seguindo a fórmula acordada polos habilitados nacionais para este procedemento.
O informe de Intervención indica que, tras esta operación, o Concello dispoñerá de 1.441.444,99 euros procedentes do superávit do exercicio, que poderán usarse para novas incorporacións de crédito e actuacións de interese municipal.
Na comisión informativa previa ao pleno, a proposta foi aprobada cos votos a favor do PSOE, as abstencións do PP e Alternativa, e os votos en contra do BNG. O goberno local lamenta que os nacionalistas busquen "dilatar novamente o pagamento, prexudicando aos provedores por motivos políticos", e asegura que todas as actuacións se axustan ás determinacións dos técnicos.