O Concello de Culleredo concede 200.000 euros en axudas a 22 clubs deportivos do municipio
O Concello de Culleredo vén de aprobar a concesión de 200.000 euros en subvencións destinadas a apoiar a actividade dos clubs deportivos do municipio. En total, 22 entidades resultan beneficiarias desta liña de axudas, que deberán completar agora os trámites de aceptación formal e posterior xustificación dos gastos realizados.
A convocatoria estruturouse en tres liñas diferenciadas. A destinada á promoción do deporte en competicións de ámbito estatal, na que se inclúen dous clubs, contou cunha dotación de 80.000 euros. Pola súa banda, os sete clubs de fútbol de campo recibirán 50.000 euros, mentres que as 13 entidades pertencentes a outras disciplinas deportivas repartirán 70.000 euros.
O executivo municipal publicou o venres 13 a resolución correspondente ás actividades desenvolvidas ao longo de 2025, unha vez superado o proceso de fiscalización por parte dos servizos económicos municipais e resolta a alegación presentada durante a tramitación.
Con esta concesión, o Concello busca reforzar a práctica deportiva entre a veciñanza a través das entidades asentadas no termo municipal. A medida complétase coa colaboración habitual do Concello nos distintos eventos que organizan os clubs ao longo do ano.
Culleredo figura ademais entre os concellos galegos que manteñen exentos aos seus clubs do pagamento de taxas polo uso das instalacións deportivas municipais. O Goberno local reafirma así o seu compromiso co deporte como ferramenta social fundamental e elemento dinamizador da vida comunitaria.