O Concello de Cambre habilitará unha área libre no Temple con novos servizos e melloras para a cidadanía
O Concello de Cambre sacou a licitación o proxecto para a creación dun novo espazo público no Temple, a parroquia máis habitada do municipio. A intervención centrarase en rehabilitar unha área de 3.658 metros cadrados na rúa Polígono, actualmente infrautilizada, para darlle un novo uso con servizos que beneficiarán á comunidade local.
Segundo explicou o concelleiro de Urbanismo, Obras, Servizos, Transporte e Medio Ambiente, Juan Leirós, a iniciativa "busca dotar a esta zona dun maior aproveitamento mediante a instalación de equipamentos que respondan ás demandas dos veciños". O proxecto contempla a colocación de novo mobiliario urbano, un incremento do arborado e a creación dunha área canina.
As obras, cun orzamento estimado de 152.874,42 euros financiado a través do Plan Único da Deputación, teñen como obxectivo converter este espazo nunha nova zona verde que sirva de punto de encontro para os residentes. As actuacións incluirán a reordenación da parcela con novos itinerarios peonís e zonas axardinadas.
Entre as tarefas a realizar atópanse o desmonte de elementos antigos, a renovación da rede de abastecemento e iluminación, a creación de pavimentos novos e a plantación de máis árbores. Tamén se acondicionará unha zona específica para cans, respondendo así ás solicitudes da comunidade.
Bombeo de Cela
Por outra banda, a xunta de goberno local adxudicou a reforma do bombeo de augas residuais de Ponte Cela, cun orzamento de 42.908,43 euros. A actuación consistirá na renovación dos equipos de caldeiraría deteriorados, a substitución da bomba en peor estado, e a elevación do pozo de bombeo e da arqueta para reducir infiltracións en caso de crecidas do río Mero. Ademais, repararanse dúas bombas submerxibles, en Anceis e Mesón Vasco.